Nga Gjon Neçaj
Çeremi, ish-fshati kufitar i vendosur në një lartësi mali, në cep të një kufiri që ndan 3 shtete, Shqipëri, Mali i Zi dhe Kosovë, e ndjen më shumë situatën ku përzihet aroma e vjeshtës së tretë me atë të dimrit,me një pamje mahnitëse të natyrës së kuqërremtë nën rrezatimin e diellit të fillimnëntorit.
Fshati, tashmë i braktisur nga banorët e tij, ndodhet 1300 metra mbi nivelin e detit, e kufizohet me Plavën dhe Gucinë, dy fshatra shqipfolëse të Malit të Zi, ku shqiptarët e ndarë nga një kufi tashmë përshëndesin njëri-tjetrin çdo mëngjes në të njëjtën gjuhë.
Ish-fshati kufitar i Çeremit, deri në fillim të viteve ’90-të të shekullit të kaluar, kishte një popullsi prej rreth 400 banorësh. Të arrije atje kërkohej leja e ish-Degës së Punëve të Brendshme, pasi të atilla ishin rregullat atëhere në sistemin monist. Ndërsa sot fshatit i ka mbetur vetëm emri i tij, Çerem, pasi aty nuk ka më banorë. Ata shihen andej vetëm gjatë stinës së verës, në muajt korrik-shtator, por kohët e fundit, siç na thonë drejtuesit e njësisë administrative Margegaj së cilës i përket Çeremi, disa nga banorët kanë mundësuar mbajtjen e bagëtive të imta, kryesisht të dhirta, pasi kushtet janë mjaft të favorshme, duke ngritur dhe një lloj kooperative.
Çeremi është një mrekulli e natyrës, ndaj nuk duhet të braktiset, për faktin se përfshihet dhe në zonën turistike të alpeve, por për këtë kërkohet në radhë të parë rruga automobilisitke që do të mundësojë shtrirjen gjithëvjetore të zhvillimit të turizmit.
Disa nga banorët që takuam shpresojnë se shteti dhe donatorët të arrijnë sa më shpejt të bëjmë realitet frekuentimin e saj. Rruga nga Dragobia në Plavë ka një gjatësi prej 14 kilometrash, e sipas projektit ajo do të zgjerohet me një gjerësi prej 6 metrash, ndërsa kostoja edhe për asfaltimin e saj arrin në rreth 20 milionë lekë.
Shumë nga çeremasit i takon edhe në qytetin Bajram Curri, ku kanë ngritur jetën e re të tyre. Dhe nuk ia përtojnë të tregojnë histori të trevës nga e kanë origjinën. Ata të thonë se janë nga fshati Vuthajt i Malit të Zi.
“Andej është origjina jonë. Këtu të parët tanë u vendosën si barinj. Dhe mbetën këtu. Ndërsa pas viteve ’90-të dalëngadalë nisën të largoheshim për një jetë më të mirë. Rikthehemi në verë e dimër me blegtori”, thotë biri i këtij fshati, Hazir Isufaj, punonjës pranë bashkisë.
Pranë fshatit Çerem është Vranica e Malit të Zi, 45 kilometra nga Bajram Curri, ndërsa Plava nga Vranica është vetëm 10 kilometra. /teheshi.com/
