E përditshmja spanjolle sportive Marca i ka zbërthyer të katër çerekfinalet e Champions League-s, të cilat u mësuan pas shortit të hedhur një ditë më parë.
Në një analizë të saj, të mbështetur dhe në një sondazh, Marca e nis me sfidën Atletiko e Madridit – Lestër Siti, ku e paraqet ekipin spanjoll si një favorit të pastër ndaj kampionëve të Anglisë.
Mbi 80 për qind e lexuesve të kësaj të përditshmeje spanjolle mendojnë se Atletiko nuk do të ketë probleme me Lestërin.
“Pasi nxori jashtë Seviljen, Lestëri nuk ka asgjë për të humbur dhe do të vazhdojë kërkimin për të bërë historinë. Vendi i tyre në Premier League nuk reflekton atë që ata janë në gjendje të bëjnë kur nënvlerësohen. Lloji i futbollit që ata luajnë në Europë është më shumë i ngjashëm me formën fituese në ligë sezonin e shkuar, sesa me fushatën e tanishme në ligë,” shkruan Marca.
“Lestër Siti është në letër pala më e dobët dhe më e parashikueshme. Mungesa e vazhdimësisë mund t’u kushtojë shtrenjtë.”
Bajern i Mynihut – Real i Madridit është një çerekfinale me mundësi kualifikimi të barabarta për të dyja skuadrat, sipas Marca-s.
“Bundesliga është thuajse e fituar, dhe cilësia brenda skuadrës së Bajernit është mes më të mirave të kontinentit. Një gabim, dhe djemtë e Ancelotti-t mund të tregohen të pafalshëm. Mbrojtja e Bajernit këtë sezon është më e depërtueshme, dhe ata gjithashtu do ta kenë të vështirë t’u bëjnë ballë yjeve më të talentuar sulmues të kundërshtarit.”
Sa për sfidën Juventus – Barcelona, votuesit janë prirur disi më tepër nga katalanasit, duke i parë ata si fitues.
“Në një përsëritje të finales së sezonit 2014-2015, Juventusi me siguri do të kërkojë të marrë hak,” nënvizon Marca.
Për të shtuar kësisoj, “Dominimi në Serinë A është një gjë, por turneu elitar i Europës është diçka krejt tjetër.”
Në përshkrimin për sfidën e fundit, Borusia e Dortmundit – Monako, Marca vë në pah besimin e votuesve, me 61 për qind, se skuadra gjermane mund t’ia dalë ndaj sulmit fantastik të Monakos dhe të shkojë në gjysmëfinale.
“Siç la të kuptohej Mançester Siti i Guardiola-s, Monako nuk ndihet rehat kur shtrëngohet të mbrojë në thellësi dhe mbetet gjatë pa topin. A do të vazhdojnë ata të imponojnë stilin e tyre të lojës?”, e mbyll analizën Marca.
Çerekfinalet e para të Champions League-s do të luhen më 11 e 12 prill, e ato të kthimit më 18 e 19 prill. /tesheshi.com/
