Humbje të thellë ka pësuar Mançester Siti në “Stamford Bridge” karshi një Çelsi të uritur për gola e fitore.
E treta humbje rresht për skuadrën e kilianit Pellegrini, që është në muajt e tij të fundit në drejtim të Sitit. Dy humbjet e mëhershme, në dy javët e shkuara, kanë qenë në kampionat, e pikërisht ndaj Lestër Sitit dhe Totenhemit.
Për shkak të kalendarit, Pellegrini hodhi në fushë një formacion të improvizuar, me pesë lojtarë të rinj. Dhe fatura e eksperimentit të detyruar qe goxha e rëndë: një humbje tenistike.
Diego Costa, Willian, Cahill, Hazard e Traore janë shënuesit e pesë golave për Çelsin, por shifrat e ndeshjes do të kishin qenë më të thella nëse Oscar do të ishte treguar më i saktë nga pika e 11-metërshit në minutën e 75-të. Goli i vetëm për miqtë e Sitit u shënua nga Faupala, 19-vjeçari francez.
Çelsi kalon me këtë fitore në çerekfinalet e FA CUP-it, me një mundësi të mirë për ta fituar atë dhe për të shpëtuar sezonin. E Mançester Siti do duhet të përqendrohet te Premier League, ku ka rrëshqitur në vend të katërt, gjashtë pikë larg kryesuesve të Lestërit. /tesheshi.com/
