Pas fitores 3-1 ndaj Arsenalit tetë ditë më parë, dukej e vështirë që një ekip si Bërnli t’i bënte ballë Çelsit. Aq më tepër që londinezët e panë veten shpejt në epërsi edhe pse luanin në fushë kundërshtare.
Pedro do të shënonte që në minutën e 7-të në “Turf Moor”, me golin e dytë që pritej të vinte nga çasti në çast pas mbizotërimit të lojës nga Çelsi.
Do të ndodhte ndryshe, pasi do të shënonin vendasit, që do të barazonin në minutën e 24-t me një gol nga Brady, në debutimin e tij të plotë që prej transferimit nga Noruiçi. Madje Bërnli mund të kishte kaluar në epërsi në fundin e pjesës së parë nëse Courtois nuk do të kishte bërë një pritje klasi.
Çelsi nuk do ta godiste qoftë edhe një herë portën në pjesën e dytë, mbase duke u pajtuar me barazimin. Rezultati 1-1 i dha mundësi skuadrës së Antonio Conte-s ta çojë në dhjetë pikë diferencën në kryesim me Totenhemin e vendit të dytë. Megjithatë, nëse Mançester Siti fiton të hënën, mund të bëhet ai ndjekësi më i afërt i Çelsit, jo me dhjetë, por me tetë pikë diferencë.
Për Bërnlin, barazimi i sotëm e çoi në gjashtë serinë e ndeshjeve në shtëpi në kampionat pa humbje. /tesheshi.com/
