Momenti i keq do të vinte një ditë për Çelsin, i pagabueshëm prej shumë javësh, dhe ai erdhi sot. Një humbje të cilën nuk e mendonte askush, aq më tepër kur shihej kundërshtari, Kristëll Pallas!
Çka e bën më tronditëse humbjen ndaj një ekipi që lufton për mbijetesë janë këto statistika: Çelsi i kishte fituar të dhjetë takimet e shkuara të kampionatit të luajtura në “Stamford Bridge”, nuk kishte humbur që nga 16 shtatori në fushën e vet duke marrë në konsideratë të gjitha aktivitetet, e nuk pësonte dy gola brenda 11 minutave të para në ndeshjet në shtëpi të Premier League-s që prej tetorit të 1995-s!
Çelsi humbi 1-2 ndaj Kristëll Pallasit, por duhet të mendojë që tani për ndeshjen e së mërkurës ndaj Mançester Sitit.
Sa i takon ndeshjes së sotme, Fabregas shënoi që në minutën e 5-të. Për miqtë realizoi Zaha në minutën e 9-të dhe Benteke në të 11-tën. Hennessey, portieri i Kristëll Pallasit, qe i pathyeshëm më tutje, duke patur rol vendimtar në fitoren.
Totenhemi, ndjekësi më i afërt i Çelsit kryesues, e shfrytëzoi mirë situatën, dhe u kthye me një fitore 0-2 nga transferta ndaj Bërnlit. Diferenca ka vajtur tani në shtatë pikë; 69 pikë ka Çelsi, 62 ka Totenhemi.
Në një tjetër takim, Mançester Junajtedi zhgënjeu ndaj Uest Bromuiçit. Takimi përfundoi 0-0; i 11-ti barazim për “djajtë e kuq”.
Befasia me emrin Lestër Siti nuk ka të ndalur, me një tjetër fitore sot: 2-0 ndaj Stouk Sitit. /tesheshi.com/
