“Vërtet, a ka ambicie Arsenali për ta fituar titullin? Nuk kam parë sot pasion apo dëshirë prej tyre. Çelsi ishte fantastik; ata e nëpërkëmbën Arsenalin dhe dominuan nga fillimi në fund.”
Eshtë ky komenti i një ish-mbrojtësi të përfaqësueses angleze, Danny Mills, pas ndeshjes Çelsi – Arsenal, të mbyllur 3-1.
I njëjti komentues shton, “Titulli është në duart e Çelsit. Nuk i shoh të humbasin katër apo pesë ndeshje. Po luajnë futboll të shkëlqyer.”
Arsenali fitonte 3-0 ndaj Çelsit në shtatorin e 2016-s, po për Premier League. Kohët kanë ndryshuar, tani është Çelsi që fiton thuajse aq.
Arsenali pati zotërimin e topit sot në “Stamford Bridge”, por i mungoi plotësisht autoriteti për të imponuar në fushë e për të rrezikuar portën kundërshtare.
Golat e Çelsit u realizuan tepër thjesht; Marcos Alonso, Hazard dhe Fabregas qenë shënuesit për vendasit. Giroud shënoi në të 91-tën minutë sa për të treguar që dhe Arsenali qe në fushë.
Çelsi bën një hap më tej përpara drejt titullit me këtë fitore. Për Arsenalin, kjo qe humbja e dytë brenda një jave. Me 12 pikë tashmë pas Çelsit, me vendin e tretë të rrezikuar seriozisht, Arsenali ngjan t’u ketë thënë lamtumirë dhe për një sezon tjetër pretendimeve për ta fituar kampionatin. /tesheshi.com/
