Skuadrat angleze dolën sërish në fushë këtë pasdite, në të 19-n javë të Premier League-s.
Skuadra që kryeson kampionatin, Çelsi, mposhti 4-2 Stouk Sitin, në të 13-n fitore të njëpasnjëshme. Takimi u ndërlikua disi kur rezultati u barazua në 2-2 në pjesën e dytë, por dy golat e mëpastajmë risollën qetësinë te londinezët.
Çelsi e çon në nëntë pikë diferencën me Liverpulin e vendit të dytë, që pret po sonte Mançester Sitin.
Fitore arriti dhe Mançester Junajtedi ndaj Midëllsbrout, edhe pse golat për “djajtë” erdhën në minutat e fundit.
Sfida vuri përballë Mourinho-n dhe Karanka-n, që te Reali i Madridit kanë punuar bashkë. Miqtë kaluan në epërsi në minutën 67-të, kur shënoi Leadbitter. Martial dhe Pogba përmbysën situatën në të 85-n dhe në të 86-n minutë, për t’i dhënë Mançesterit fitoren 2-1.
Lestër Siti bëri atë që duhej të bënte ndaj Uest Hemit: të fitonte me çdo kusht. Pozita e mjerë në renditje e bënte të detyrueshme fitoren, e cila erdhi, edhe pse qe e ngushtë. Lestëri fitoi 1-0 me një gol të Slimani-t në minutën e 20-të dhe u ngjit në kuotën e 20 pikëve.
Në takimet e tjera, Bërnli mposhti 4-1 Sandërlendin, Sauthemptoni u mund në shtëpi 1-2 nga Uest Bromuiçi, e Bornmëthi fitoi 0-3 në transfertën ndaj Suonsi Sitit. /tesheshi.com/
