Ministrja çeke e Mbrojtjes Jana Chernochova do t’i propozojë qeverisë së këtij vendi javën e ardhshme dërgimin e një ngarkese me municion artilerie në Ukrainë në një kohë kur ka frikë se Rusia mund të përgatisë një pushtim.
Vendet perëndimore kanë frikë se Moska po planifikon një sulm të ri ndaj Ukrainës, të cilën e pushtoi në vitin 2014 dhe aneksoi Krimenë.
Chernochova tha se Republika Çeke zgjodhi armatim 152 milimetrash nga lista e rezervave të kërkuara nga qeveria në Kiev.
“Do të ishte donacion, po e zgjidhim procedurën që të bëhet sa më shpejt. Ne po i themi qartë Ukrainës se jemi me të”, tha ajo pas takimit me ministrin e Jashtëm Jan Lipavsky për këtë çështje.
Chernochova tha se detaje të mëtejshme të dërgesës do të publikohen pasi qeveria të shqyrtojë propozimin të mërkurën e ardhshme.
Lipavsky tha se Republika Çeke ishte gati për një “skenar të rastit më të keq” në një situatë të shkaktuar nga “taktikat e shantazhit të Rusisë që kërcënojnë të pushtojnë Ukrainën”.
Rusia mohon planifikimin e një sulmi, por thotë se mund të ndërmarrë veprime të papërcaktuara ushtarake nëse nuk përmbushen kërkesat e sigurisë.
Pavarësisht diplomacisë intensive me Rusinë, Shtetet e Bashkuara dhe aleatët e saj të NATO-s thonë se nuk mund të marrin në konsideratë kërkesat e Moskës për garanci sigurie, pasi ajo mbledh trupa pranë kufirit të fqinjit të saj dhe zhvillon stërvitje ushtarake në Bjellorusi. /tesheshi.com/
