Kryetari i Partisë Liberal-Demokratike të Serbisë, Çedomir Jovanoviç ka quajtur Srebrenicën si “turpi dhe mëkati i Serbisë”, dhe ka thënë se do të shkojë aty sa herë të paraqitet nevoja për t’u përkulur para viktimave të një marrëzie politike.
“Srebrenica është turpi dhe mëkati ynë. Turp i një politike zyrtare e cila ka filluar të përhapet nga Beogradi në dekadën më të errët të së kaluarës sonë të kohëve të fundit, dhe unë jam i vetëdijshëm që shumë njerëz nuk ndihen rehat mu për këtë shkak. Unë do të shkoj atje sa herë që të ketë nevojë për t’u përkulur para viktimave të një marrëzie politike. Ky nuk është vetëm detyrimi im si një politikan. Kjo është më e pakta që mund të bëj. Është detyrë imja si një njeri dhe një prind që të jem atje më 11 korrik”, tha ai për të përditshmen beogradase Danas.
Jovanoviç është deklaruar kështu para se të shkojë për në Srebrenicë për të përkujtuar viktimat e gjenocidit, duke u përgjigjur në pyetjen nëse pritet që, ngjashëm me vitin e kaluar, të akuzohet nga Aleksandar Vulin dhe Milorad Dodik se po e shfrytëzon këtë ngjarje për promovim personal.
“Merrem me politikë për një kohë kaq të gjatë sa do të kisha injoruar komentet e njerëzve të cilët gjithë jetën dhe karrierën e tyre personale e kanë ndërtuar duke ‘gurëzuar’ këdo që mendon ose sillet ndryshe. Kjo është veçanërisht e vërtetë për Dodikun dhe Vulinin, dhe nuk është e rastësishme që janë mu ata të cilët janë prononcuar pas shkuarjes sime të fundit në Srebrenicë. Ata e dinë shumë mirë se ballafaqimi me pasojat e luftës, tejkalimi i konfliktit dhe relaksimi i marrëdhënieve në rajon, i shtyn në margjinat e jetës politike, dhe për këtë arsye do të jem gjithmonë ai që do të qëndrojë para tyre, i gatshëm për të luftuar, pavarësisht nga çmimi të cilin më duhet ta paguaj personalisht për këtë”.
I pyetur se çfarë mund të bëjë Beogradi zyrtar në kontekst të shënimit të përkujtimit të viktimave të Srebrenicës, Jovanoviç është shprehur:
“Nuk është çështja se çfarë mund të bëjë Beogradi me rastin e shënimit të këtij përvjetori. Çështja është se çfarë duhet të bëjë Beogradi çdo ditë, në mënyrë që rajoni i cili ende jeton me plagët e luftës, të arrijë të dalë nga ato llogore ku vazhdojmë të qëndrojmë edhe sot e kësaj dite dhe që ata njerëz të mrekullueshëm, veçanërisht qytetarët e Srebrenicës të fillojnë një jetë dinjitoze të cilën e meritojnë. Çdo takim në mes zyrtarëve të Bosnjës, Serbisë dhe Kroacisë është një mundësi e mirë për t’i kushtuar një vëmendje të veçantë Bosnjës të cilën ajo e meriton, dhe për të dërguar mesazh të veçantë, se veçanërisht ne nuk kemi të drejtë t’ua kthejmë shpinën këtyre njerëzve, të cilët tani janë në margjina të të gjitha ngjarjeve të botës”, ka përfunduar Jovanoviç. /tesheshi.com/
