Në raportin e rregullt gjysmëvjetor të Sekretarit të Përgjithshëm të Kombeve të Bashkuara, Antonio Guterres për Kosovën, thuhet se retorika e shtuar ndërmjet Prishtinës dhe Beogradit dhe përshkallëzimi i tensioneve në terren ka ndikuar në progresin në normalizimin e marrëdhënieve në periudhës nga 16 mars deri më 15 shtator të këtij viti.
Siç thuhet në raportin e publikuar në faqen e OKB-së, i cili do të prezantohet më 18 tetor në seancën e Këshillit të Sigurimit, të dyja palët kanë debatuar kryesisht për votën në Kosovë gjatë zgjedhjeve në Serbi, çështjen e lirisë së lëvizjes dhe aplikimin e marrëveshjeve të mëparshme për çështjet e energjisë dhe komunitetin e komunave serbe.
“Tensionet dhe retorika e nxehtë gjatë periudhës së mbuluar nga ky raport pasqyrojnë situatën e brishtë në terren. Ngjarjet e 31 korrikut në veri të Kosovës, si reagim ndaj vendimeve të Qeverisë së Kosovës lidhur me lirinë e lëvizjes, ishin një përshkallëzim i rëndë, i cili e solli situatën në prag të ballafaqimit me pasoja potencialisht tragjike”, thuhet në raportin e Sekretarit të Përgjithshëm të OKB-së.
Mbështetja e vazhdueshme e zyrtarëve të Bashkimit Evropian dhe aktorëve të tjerë ndërkombëtarë ndihmoi në uljen e tensioneve dhe ruajtjen e angazhimit në dialogun e ndërmjetësuar nga BE, vë në dukje Guterres.
Ai vlerëson se paqja mbizotëroi falë angazhimit të gjerë të diplomatëve, duke theksuar se duhet të potencohet sa duhet rëndësia e përmbajtjes dhe respektimit të dialogut për zgjidhjen e mosmarrëveshjeve.
Takimi i nivelit të lartë ndërmjet Kosovës dhe Serbisë, i cili u mundësua më 18 gusht, tregoi përkushtimin e tyre për zgjidhje paqësore përmes dialogut me ndërmjetësimin e BE-së, theksoi Guterres në raport. Ai u bëri thirrje të dyja palëve që të vazhdojnë angazhimin e tyre për ruajtjen e integritetit të procesit të dialogut dhe zgjidhjen e të gjitha çështjeve të pazgjidhura. /tesheshi.com/
