Profesor Përparim Kabo, i cili për një kohë ka qenë dhe këshilltar i ish-kryeministrit Nano, tha se problemet e Arsimit të Lartë në Shqipëri nuk janë bash ato për të cilat janë ngritur studentët. I ftuar në Top Talk në TCH, prof. Kabo tha se revolucioni i pretenduar duhet nisur nga kurrikulat, e se dufi i tyre ka ardhur dhe për shkak të mos marrjes në konsideratë të asaj çka vërtet vuan arsimi.
“Mos marrja në konsideratë e gjendjes sot, solli këtë duf”.
“I mbështes ata, por them se janë parciale se nuk zgjidhet çështja e arsimit vetëm me përgjysmimin e tarifave, më përmirësimin e kushteve në konvikte e auditorë. Themelor është ai që sot në botë njihet si revolucioni kurrikular. Përgatitja e dijes në atë që sot njihet si epoka kibernetike”, tha prof. Kabo, cituar nga TCH.
Por a ka çaluar vërtet reforma në Arsimin e Lartë që pasohet me të tilla reagime, edhe pse në dukje për çështje të vogla?
Ja cili është gjykimi i profesorit:
“…në 10 vitet e fundit 3 herë ka ndryshuar ligji për Arsimin e Lartë. E para për kompetencë profesionale të atyre që e kanë bërë, E dyta sepse arsimi nuk është parë si baza e zhvillimit të vendit. E treta sepse në përgjithësi ndryshime në arsim nuk janë mbështetur me fatura financiare. Nuk mund të bëhen ndryshime pa përcaktuar sa do të investosh. E papërfillshme shuma e përcaktuar në buxhet që do të shkojë për kërkimin shkencor”, u shpreh prof. Kabo. /tesheshi.com/
