Angela Merkel ka pësuar një mposhtje drithëruese në zonën e saj elektorale, shtetin lindor të Mecklenburg-Vorpommern, pasi kristian-demokratët e saj u renditën të tretët pas social-demokratëve dhe populistëve të krahut të djathtë, Alternativa për Gjermaninë, AfD.
Të dhënat e para pas mbylljes së qendrave të votimit tregojnë se qendra e majtë SPD ka fituar rreth 30.2 për qind të votave, partia anti-emigracion AfD 21.4 për qind dhe qendra e djathtë e kancelares, CDU ka marrë rezultatin më të përvuajtur të të gjitha kohërave në shtetin verilindor të Gjermanisë, me vetëm 19.8 për qind. Më herët gjatë vitit, CDU dukej se do të ishte partia e parë në zgjedhje e do të ishte në gjendje të formonte qeverinë e ardhshme.
Prej dhjetë vjetësh, Mecklenburg-Vorpommern është qeverisur nga “koalicioni i madh” mes CDU-së dhe SPD-së, në një reflektim të pastër të strukturës qendrore federale të pushtetit. Por duket se debati i fuqishëm lindur nga menaxhimi që kancelarja Merkel i bëri krizës së refugjatëve, ka dhënë ndikimin e vet. Mosmiratimi i publikut ka shtuar mbështetjen për “Alternativën për Gjermaninë”, që kryesohet nga Leif-Erik Holm, një prezantues radioje me seli në lagjen multikuturale të Berlinit, Prenzlauer Berg. Mbështetja vjen edhe pse shteti verilindor është ndër ato shtete që ka vuajtur më pak nga barra e krizës së refugjatëve.
Edhe pse rezultati nuk ka ndikim të drejtpëdrejtë në funksionimin e qeverisë gjermane dhe shteti Mecklenburg-Vorpommern ka një popullsi prej vetëm 1.6 milionë banorësh, renditja e treta në zgjedhje ka një vlerë simbolike ndërsa priten zgjedhjet rajonale në Berlin më 18 shtator dhe zgjedhjet e përgjithshme vitin e ardhshëm. Angela Merkel qëndron në pushtet prej vitit 2005, dhe ende nuk ka konfirmuar nëse do të kandidojë për një mandat të katërt qeverisës në vitin 2017.
Ndërsa socialdemokratët dolën në zgjedhje si parti e parë dhe rezultatet për kristiandemokratët janë veçanërisht poshtëruese, partitë e majta në shtet kanë humbur gjithashtu. Partia majtiste Die Linket dhe të Gjelbrit ranë në një total prej 14 për qind.
AfD, në të kundërt, vijon një trend mbresëlënës të fitoreve elektorale në nivel rajonal. Tre vjet pas themelimit si një biletë anti-europiane në krizën e vitit 2013, ajo përfaqësohet tashmë në parlamentin e nëntë shteteve në Gjermani.
Bashkëthemeluesi i partisë, Frauke Petry, i përshkruan rezultatet e së dielës si një “goditje për Angela Merkelin”. “Tashmë është përgjegjësia jonë të bëjmë politikë për njerëzit. Njerëzit nuk kanë më besim tek mjedisi i vjetër i partive politike”, thotë Petry.
Natën e së dielës, kandidati i CDU-së, Lorenz Caffier tha se gjatë fushatës ishte ngritur vetëm një subjekt, politika për krizën e refugjatëve. Dhe sipas tij, kjo vendosi gjithçka.
Shteti më verior nga pesë shtetet e Gjermanisë Lindore që u bashkuan me Gjermaninë Perëndimore në vitin 1990, Mecklenburg-Vorpommern ka qenë në të kaluarën i trazuar nga rënia industrial dhe nga rritja e popullsisë, por gjatë vitit të kaluar u regjistrua niveli më i ulët i papunësisë dhe prodhimi më i lartë bruto që nga koha e ribashkimit.
Pjesërisht për shkak të dobësisë ekonomike dhe dendësisë së pakët të popullsisë, rajonit iu caktuan më pak refugjatë sesa landeve të tjera gjermane: 23,080 azilkërkues u regjistruan në Mecklenburg-Vorpommern në vitin 2015, gati çereku i numrit të caktuar në shtetin me madhësi të përafërt, Hesse. Vetëm 3.7 për qind e shtetit është me origjinë jo-gjermane, një nga nivelet më të ulëta në vend.
Vitin e kaluar, shteti ka regjistruar asnjë incident me sfond kriminal, si sulm terrorist apo përdhunim, nga ana e azilkërkuesve dhe rënie të vjedhjeve apo krimit të dhunshëm. Policia në Mecklenburg-Vorpommern regjistroi shtatë përpjekje për zjarrvënie në strehat e refugjatëve gjatë vitit 2015.
Përgatiti: Juli Prifti – /tesheshi.com/
