Një muze kushtuar jetës dhe veprës së aristokratit dhe poetit britanik Lord Bajron do të hapë së shpejti dyert e tij në qytetin verior italian të Ravenës.
Sipas Guardian, muzeu ndodhet në Palazzo Guiccioli, ndërtesa historike ku Bajroni pati një lidhje dashurie pasionante me konteshën Teresa Guiccioli, gruan e një aristokrati dhe përfundoi disa nga veprat e tij më të mëdha.
Bajroni u zhvendos në pallat në 1819 dhe jetoi atje nën çatinë e burrit të konteshës, të cilin e kishte takuar në një pritje në Venecia. Rezidenca e bollshme në qendër të Ravenës është rinovuar nga Fondacioni Cassa di Risparmio di Ravenna dhe nga data 29 nëntor vizitorët do të mund të vizitojnë vendet ku ka lindur një dashuri e madhe dhe ku ka kryevepra si “Don Juan”, “Sardanapalos”, “Profecia e Dantes” dhe kënga e fundit e ” Çajld Haroldit”.
Në një nga dhomat e muzeut janë vendosur suvenire nga dashuria mes konteshës dhe poetit, si letra, bizhuteri dhe kaçurrela nga flokët të Bajronit.
Një krah i muzeut i kushtohet Risorgimento-s, lëvizjes italiane të shekullit të 19-të për bashkimin e Italisë, për shkak të lidhjeve të Bajronit me Karbonarët, një organizatë jozyrtare e “kompanive” sekrete revolucionare që kontribuan në procesin e bashkimit.
“Ideja është të lidhim tre aspekte të personalitetit të Lord Bajronit – poetin, dashnorin dhe njeriun e orientuar drejt lirisë”, tha një zëdhënës i muzeut.
Një jetë plot pasione
Lord Bajroni vdiq në 1824 në Mesolongji, nga ku luftoi për çlirimin e Greqisë. Edhe pse gjatë jetës së tij pati disa lidhje dashurie, kontesha Tereza ishte dashuria e tij e fundit e madhe.
“Dashuria për Terezën e çoi Bajronin drejt një transformimi të brendshëm”, tha Antonio Patuelli, president i fondacionit Cassa di Risparmio di Ravenna.
Vizitorët e muzeut do të kenë mundësinë të jetojnë përvojat e poetit në Itali dhe të mësojnë se çfarë e frymëzoi punën e tij, me ndihmën e teknologjisë interaktive të realitetit virtual. /tesheshi.com/
