Nga Mensur Krasniqi
Vazhdon fluksi i emigrantëve në Maqedoni. Numri i tyre nuk do të jetë më i vogël as në stinët e vjeshtës dhe të dimrit, pohojnë nga UNHCR.
Nga UNHCR rekomandojnë që Maqedonia duhet të krijojë një plan konkret për mikëpritjen e refugjatëve, meqë sipas Mohammad Arif, përfaqësues i UNHCR-së, gjendja e refugjatëve, vazhdimisht po përkeqësohet ndërsa numri i tyre po trefishohet.
“Ka shumë gjasa që në të ardhmen të vijnë shumë më tepër refugjatë. Këtë e bazojnë në atë çfarë po shohim në Greqi, ata po arrijnë nga Turqia në numër të madh. Cdo ditë qindra njerëz vijnë në ishujt grekë dhe pastaj udhëtojnë nëpër Greqi, nëpër Selanik kalojnë kufirin e vendit. Kjo do thotë se numri do të rritet. Tani është shumë e vështirë të thuhet saktësisht se sa do të vijnë në këtë vend, por një gjë dihet, se vala e refugjatëve do të vazhdon edhe gjatë dimrit”, u shpreh Mohammad Arif, përfaqësues i UNHCR-së në Maqedoni.
I njëjti në një intervistë për radion Evropa e Lirë vuri në dukje se nuk është e qartë pse qeveria kohët e fundit vendosi të shpallë një situatë krize në kufi me Greqinë dhe Serbinë, por beson se ndoshta kishin arsyet e tyre dhe arsyetimin për atë hap; dhe theksoi se qeveria shpejt e kuptoi se kjo nuk ishte mënyra se si bëhen gjërat.
“Duke parë fluksin e njerëzve, numrin e tyre, duke parë shkallën e dëbimit, nuk do të jetë e lehtë të mbahen, të bllokohen. Sepse në qoftë se ka bllokim do të shkaktohen shumë vuajtje, shumë mjerim. Këta njerëz, 85 përqind e tyre vijnë nga Siria apo vende të tjera që prodhojnë refugjatë; prandaj ne në UNHCR e quajmë problemin e refugjatëve dhe emigrantëve. Kjo nuk është një situatë e emigrantëve- duhet të dini në mesin e tyre ka refugjatë dhe emigrantë. Ata vijnë nga vende të tilla si Siria, psh. shikoni situatën në Siri dhe se si këta njerëz jetojnë 4 deri 5 vitet e fundit, ata arritën në fundin e vuajtjeve, vuajnë aq shumë dhe nëse ju i mbani, nëse përpiqeni t`i bllokoni në rrugën e tyre, do të shkaktoni vuajtje njerëzore dhe shumë mjerim,” deklaroi Mohammad Arif.
Në periudhë prej 19 qershor deri 6 shtator të këtij viti Maqedonia ka dhënë gjithsej 62 mijë e 586 vërtetime për kërkim leje të azilit shtetasve të huaj.
Prej tyre 42 mijë e 516 janë burra, 8 mijë e 574 gra, 9 mijë e 994 fëmijë. Më së shumti 50 mijë e 970 janë nga Siria, më pas nga Afganistani 3 mijë e 477, Iraku 2 mijë e 849, Pakistani 1 mijë e 741 etj. /tesheshi.com/
