Ministri i Jashtëm turk, Mevlüt Çavuşoğlu, u kanë dhënë një përgjigje të fortë deklaratave të fundit të presidentit të Parlamentit Europian, Martin Schulz-it.
Duke folur në një konferencë shtypi me homologun kinez, Çavuşoğlu u tha gazetarëve të dielën: “Schulz po përdor një gjuhë kërcënuese në deklaratat e tij mbi Turqinë, por ajo nuk do të ketë ndikim mbi vendin tonë. Ajo çka po shohim është se BE-ja dhe parlamenti i saj po përdorin një retorikë hipokrite.”
“Ata po e mbrojnë shumë mirë PKK-në. A bënë ndonjë deklaratë Schulz-i dhe ata që mendojnë si ai pasi qeverisësi ynë u flijua?”, pyeti Çavuşoğlu, duke iu referuar një drejtuesi lokal që vdiq të premten nga plagët e marra prej një sulmi të terroristëve të PKK-së.
“[Schulz-i] duhet të ndalojë së pari aktivitetet e PKK-së në Parlamentin Europian. Nëse ai është aq i fuqishëm, ta përdorë këtë ligjërim kundër atyre që mbështesin terrorin në vendet anëtare të BE-së,” ka qenë përgjigjja e kryediplomatit turk ndaj Martin Schulz-it.
Presidenti i Parlamentit Europian ka folur më herët gjatë këtij muaji për sanksione kundër Turqisë, duke reaguar ndaj arrestimit të disa gazetarëve të një të përditshmeje turke, si dhe të një numri deputetësh të partisë prokurde HDP, të akuzuar për mbështetje të terrorizmit. /tesheshi.com/
