Ministri i Jashtëm i Turqisë, Mevlut Çavushoglu, ka ftuar Greqinë për mbledhjen e parë të bisedimeve hulumtuese brenda muajit janar, për të zgjidhur mosmarrëveshjet që kanë të dyja vendet, raporton Anadolu Agency (AA).
Ai zhvilloi një konferencë të përbashkët për media pas takimit me homologun e tij nga Republika Turke e Qipros Veriore (TRNC), Tahsin Ertugruloglu. Aty, Çavushoglu tha se me Greqinë deri më sot janë zhvilluar 60 bisedime dhe kanë dalë në pah mbi 5.000 faqe dokumente.
“Ftojmë Greqinë për mbledhjen e parë të bisedimeve hulumtuese brenda muajit janar”, tha ai, duke komentuar dhe ftesën e kryeministrit Rama për të organizuar një takim me kryediplomatin grek Nikos Dendias në Tiranë.
Ai tha se në këtë periudhë Dendias ka hyrë në karantinë.
“Pas këtij takimi të parë, jam i gatshëm të takoj Dendiasin duke shkuar në Tiranë me ftesën e Ramës. Kjo është një ftesë, shpresoj që Greqia nuk e refuzon këtë mundësi, këtë ftesë dhe së shpejti fillojnë bisedimet hulumtuese”, tha kryediplomati turk. /tesheshi.com/
