Shefi i diplomacisë turke, Mevlut Çavushoglu ka ftuar në Ankara homologun e tij shqiptar, Ditmir Bushati për t’i kërkuar zyrtarisht mbylljen e shkollave dhe bizneseve të organizatës FETO në Tiranë.
Burime në MPJ bënë të ditur se vizita e Bushatit ka qenë e planifikuar për muajin e ardhshëm, por vetë Çavushoglu ka kërkuar shpejtimin e saj.
Ndërkaq, vetë ministri i jashtëm shqiptar, Ditmir Bushati është përfolur nga qarqe të ndryshme se ka lidhje me strukturat e Gylenit në Tiranë.
Një zyrtar i rëndësishëm turk, deklaroi dy ditë më parë nga Shkupi se Shqipëria “nuk duhet të shesë miqësinë me Turqinë për pesë shkolla të organizatës terroriste.”
Rifak Sait, ish-deputet i AK-Parti, i cili ka origjinë shqiptare dhe është emëruar nga Erdogan si drejtues i një qendrë lobimi për Ballkanin, ka shkuar shumë larg në një prononcim për agjencinë turke të lajmeve Anadolu, kur ka thënë se në shkollat e FETO-s në Shqipëri shkollohen fëmijët e elitës politike dhe asaj shtetërore të Tiranës.
Sait ka lëshuar edhe një ultimatum të fortë kur ka thënë se “se liderët e vendeve të Ballkanit duhet të mendohen mirë teksa shprehen se nuk mund të mbyllim shkollat e organizatës terroriste FETO”. /tesheshi.com/
