Ministri i jashtëm turk Mevlut Çavushoglu tha të enjten se blerja nga Turqia e sistemit të raketave S-400 nga Rusia, e cila ka shkaktuar tensione me Uashingtonin, është një “punë e kryer” dhe se ajo nuk mund të anullohet.
Ai mbajti një konferencë shtypi në prag të vizitës në Shtetet e Bashkuara, duke thënë se marrëdhëniet mes Turqisë dhe Rusisë nuk janë një alternativë për aleancën e saj me NATO-n apo me Bashkimin Evropian, sipas Reuters.
Çavushoglu rikujtoi se Ankaraja e ka njoftuar vazhdimisht Uashingtonin për këtë.
Më parë, në një konferencë në Uashington, Sekretari i Shtetit Mike Pompeo tha se SHBA po vazhdonte bisedimet me Turqinë mbi planet e saj për të blerë sistemin mbrojtës S-400 nga Rusia.
Ai shtoi se i kishte folur me homologun turk dhe se ishte i bindur që dy aleatët e NATO-s do të ishin në gjendje të ecnin në një rrugë të përbashkët. /tesheshi.com/
