Ministri i Jashtëm turk ka dhënë një intervistë për të përditshmen gjermane Bild, ku nuk është rezervuar aspak për të shprehur pakënaqësinë e zhgënjimin e thellë për qëndrimin e vendeve europiane ndaj Turqisë pas grushtit të dështuar të shtetit.
Poshtërim e ka quajtur ai sjelljen e unionit europian, ndërkohë që është pritur mbështetje në një moment tejet të vështirë për popullin turk.
“Në vend që ta ndihmojnë Turqinë, (vendet europiane) po na poshtërojnë,” ka thënë hapur Mevlyt Çavushogllu.
Si pak vende, Turqia ka bërë përpjekje të mëdha për t’i plotësuar kushtet e hyrjes në BE, është nënvizimi i të intervistuarit. Por si shpërblim, parashtron ai, Turqia ka marrë vetëm kërcënime, fyerje dhe bllokim të plotë.
“Pyes veten,” është shprehur për Bild-in Çavushogllu, “çfarë krimi kemi bërë? Pse kjo armiqësi?”
Në intervistën me gazetarin e së përditshmes gjermane është prekur dhe çështja e marrëveshjes për emigrantët, aq e diskutuar së fundi.
Shefi i politikës së jashtme të vendit euroaziatik e ka bërë të qartë se BE-ja do duhet të mundësojë në tetor udhëtimin pa viza për turqit, përndryshe marrëveshja nuk do të respektohet.
“Eshtë e qartë: ose do t’i vëmë së bashku në zbatim të gjitha marrëveshjet, ose do t’i lëmë mënjanë të gjitha,” ka qenë përgjigjja e tij.
Ndërsa për zërat mbi daljen e Turqisë nga NATO-ja, Çavushogllu e ka quajtur atë spekulim nga qarqe antiturke. “Turqia është një nga mbështetëset më të mëdha të NATO-s,” ka vënë pikën ai.
Një muaj pas përpjekjes së dështuar për një grusht shteti, Turqia nuk është vizituar ende nga ndonjë udhëheqës europian i nivelit të lartë. Deklaratat e zyrtarëve të BE-së kanë lënë gjithashtu për të dëshiruar, me fokusin te paralajmërimet për vetëpërmbajtje nga autoritetet turke, e jo te dënimi i grushtit të shtetit. /tesheshi.com/
