Edhe pse Turqia është përfshirë fort në një përpjekje për t’u dhënë fund luftimeve në konfliktin sirian përmes një marrëveshjeje armëpushimi, përjashtohet mundësia që të ketë bisedimeve me shefin e regjimit sirian.
Yeni Şafak raporton që këtë ta ketë deklaruar kryediplomati turk. “Eshtë jashtë diskutimi për Turqinë që të zhvillojë bisedime me Esadin,” thuhet në të përditshmen turke të jetë shprehur Mevlyt Çavushogllu.
E sa për armëpushimin në tërë Sirinë, për planin e së cilit u gjet pajtimi dje midis Rusisë dhe Turqisë, Çavushogllu mësohet të ketë thënë se ajo do të vihet në zbatim prej vitit të ri.
Plani i armëpushimit do të zbatohet në të gjithë territoret ku ka përplasje mes forcave qeveritare dhe atyre opozitare.
“Të gjithë luftëtarët e huaj në Siri, duke përfshirë Hezbullahun, duhet ta lënë vendin,” ka nënvizuar shefi i politikës së jashtme turke.
Një çështje tjetër e komentuar nga Çavushogllu ka qenë mbështetja që po merr dega siriane e PKK-së, PYD-ja, nga SHBA-ja.
“Shtetet e Bashkuara po i japin qartësisht armë milicisë së YPG-së në Siri. Ato nuk po u sigurojnë mbështetje ajrore operacioneve në Siri të përkrahura nga Turqia për shkak të presionit të YPG-së.” /tesheshi.com/
