Pengimi nga autoritetet gjermane i organizimit të takimeve të shtetarëve turq me komunitetin e bashkatdhetarëve të tyre në Gjermani vijon të jetë në qendër të vëmendjes, vijon t’i mbajë të tensionuara marrëdhëniet dypalëshe.
Edhe një herë tjetër ka qenë ministri i Jashtëm turk, Mevlyt Çavushogllu, që ka ngritur zërin ndaj sjelljes së Gjermanisë, duke e akuzuar atë për ndërhyrje në fushatën për referendumin e 16 prillit mbi ndryshimet kushtetuese, e për favorizim të fushatës për “jo”-në.
Duke folur para qindra turqve në konsullatën e përgjithshme të vendit të tij në Hamburg, Çavushogllu është shprehur se, “Ky është një pengim sistematik, dhe Gjermania po ushtron presion sistematik mbi qytetarët tanë. Kjo është e papranueshme. Duam gjithmonë ta shohim Gjermaninë si një mike, por qasja sistematike antiturke e Gjermanisë nuk i shkon për shtat miqësisë sonë.”
Kryediplomati i akuzoi autoritetet gjermane për standarde të dyfishta e për ndërhyrje në fushatë dhe në punët e brendshme të Ankarasë.
“Ata të cilët janë në favor të ‘po’-së në referendum janë penguar, por ata të cilët janë në favor të ‘jo’-së janë mbështetur. Ky nuk është një qëndrim i drejtë. Askush nuk ka të drejtë të ndërhyjë në një vend tjetër në referendum, në zgjedhje. Kjo nuk është po ashtu demokratike.”
Çavushogllu u detyrua të flasë në godinën e misionit diplomatik me bashkatdhetarët e tij pasi takimi në një tjetër mjedis në Hamburg u anulua të hënën. Shefi i diplomacisë turke tha se policia, agjencitë e shërbimit të fshehtë dhe autoritetet lokale gjermane kishin ushtruar presion mbi administruesit e sallës për ta anuluar tubimin.
“Mos na jepni ne mësime në çështje të tilla si të drejtat e njeriut dhe demokracia. Ne i përmbahemi parimit se nuk duhet ndërhyrë në politikën e brendshme të një vendi mik. Gjermania nuk duhet të ndërhyjë në politikën tonë, as në referendumin tonë,” deklaroi ai nga konsullata turke në Hamburg.
Një varg tubimesh të zyrtarëve turq janë anuluar gjatë javës së shkuar. Nga rreth tre milionë turq që jetojnë në Gjermani, gjysma e tyre mund të votojnë në referendum. Një votim të cilin mund ta kryejnë në misionet diplomatike në ditët e fundit të marsit dhe në javën e parë të prillit.
Referendumi për ndryshimet kushtetuese është me rëndësi të jashtëzakonshme për Turqinë; nëse vota “po” fiton, vendi do të ketë një sistem presidencial, që do t’i japë fund kaosit dhe paqëndrueshmërisë shumëdekadëshe. /tesheshi.com/
