E përditshmja sportive spanjolle “AS” i referohet gazetarit italian Nicolo Schira tek pretendon se lëvizja e pritshme e uruguajanit Cavani për në Madrid pritet të realizohet së shpejti.
Saga po shkon drejt fundit, sipas “AS”-it, sepse Atletiko e Madridit e ka rritur ofertën për PSG-në në 15 milionë euro nga 10 milionë që ishte më herët.
Lojtari dhe klubi spanjoll e kanë gjetur gjuhën e përbashkët, dhe tani mbetet miratimi nga drejtuesit e kampionëve të Francës për ta shitur lojtarin që në fund të qershorit i mbaron kontrata.
Atletiko e Madridit ka patur një pjesë të parë të sezonit jo të mirë, megjithëse mban vendin e tretë në kampionat. Ekipit i duhet me patjetër një sulmues pas dëmtimit të gjatë të Diego Costa-s. Vetë Cavani po e merr veten nga një dëmtim prej të cilit ka munguar në ndeshjet e fundit.
Uruguajani ka luajtur vetëm 568 minuta në 14 ndeshje të këtij sezoni për PSG-në, i ulur shpesh në stol për mungesë hapësirash në njëmbëdhjetëshen e parë. /tesheshi.com/
