Ish-kryeministri italian Silvio Berlusconi, i cili është 86 vjeç, u largua nga spitali i Milanos sot, ku u shtrua gjashtë javë më parë për shkak të leuçemisë dhe një infeksioni në mushkëri, raportoi një fotoreporter i AFP.
Silvio Berlusconi u lirua nga spitali San Raffaele në kryeqytetin e Lombardisë rreth orës 13:15 në një makinë me xhama të lyer dhe nuk bëri ndonjë deklaratë publike pasi u largua.
Më 5 prill, Berlusconi u shtrua në spitalin San Raffaele në Milano për shkak të një infeksioni në mushkëri, pas së cilës mjekët dyshuan fillimisht për leuçemi.
Pas shtrimit në spital, mjekët thanë se Berlusconi vuante nga leuçemia kronike mielomonocitare. Ata nuk thanë se kur u diagnostikua për herë të parë kanceri i tij, vetëm se gjendja nuk ishte akute.
Në vitet e fundit, ai u shtrua në spital disa herë, përfshirë një herë në vitin 2020, pas infektimit me COVID-19.
Partia Forza Italia e Berlusconit është partnere në qeverinë e koalicionit të kryeministres aktuale Giorgia Meloni dhe Berlusconi, themeluesi i partisë, është ende presidenti i saj.
Pavarësisht se është në Senat, Berlusconi shihet rrallë në publik.
Në fillim të majit, ai u dërgoi dy videomesazhe anëtarëve dhe mbështetësve të partisë së tij. Në kongresin e Forza Italia, ai tha se ishte gati të kthehej në punë.
Javën e kaluar ai u vizitua në spital nga dy nga aleatët e tij kryesorë politikë, Meloni dhe ministri i Transportit dhe Zëvendëskryeministri Matteo Salvini, të cilët thanë se ai po shërohej dhe ishte në “gjendje shpirtërore të mirë”.
Deri më tani, nuk dihet se kush mund ta zëvendësojë Berlusconin si president i Forza Italia dhe as nëse partia do të mbijetojë pa udhëheqjen e tij. /tesheshi.com/
