Nënkryetari i lëvizjes Vetëvendosje, Driton Çaushi i është kundërpërgjigjur deklaratës së kryeparlamentarit, Kadri Veseli, i cili deklaroi më herët se bllokimi i seancës nuk e ndihmon askënd.
Sipas Çaushit, Kosova ka ardhur në këtë gjendje, pikërisht ngaqë Kadri Veselit dhe drejtuesve të tjerë të institucioneve, sovraniteti shtetëror i duket “çështje e thatë”.
Ai replikoi me kryeparlamentarin edhe për apelin e këtij të fundit kur tha se në vend të bllokimit të Kuvendit, duhet të diskutohet për përmirësimin e jetës së qytetarëve.
“Por, me Trepçën që po e ndani etnikisht, me Ujmanin që po ia falni Serbisë, me Brezovicën që po e leni në dorë të Zajednicës, me ndarjen etnike që do të prodhojë konflikte të reja, si do të përmirësohet jeta e qytetarëve,” ka theksuar Çaushi.
“Nuk mund të dalim dot nga kjo gjendje pa ju larguar nga pushteti juve, që çështjen kryesore të republikës, e konsideroni temë boshe për të cilën nuk duhet diskutuar. Prandaj, debati për përmirësimin e jetës së qytetarëve fillon me kërkesën për dorëheqjen tuaj. Sepse, nuk ka përmirësim të gjendjes me politikanë të korruptuar e shantazhuar në krye të shtetit”, ka shkruar Çaushi në profilin e tij në Facebook./tesheshi.com/
