Kombëtarja e Spanjës, e cila gjendet në një grup me përfaqësuesen e Shqipërisë në eliminatoret e Botërorit të 2018-tës, do të luajë dy takime në fillim të shtatorit.
Më 1 shtator do të jetë miqësorja në Bruksel ndaj Belgjikës, kurse katër ditë më pas, më 5 shtator, në kuadër të eliminatoreve të Botërorit, Spanja do të luajë me Lihtenshtajnin.
Trajneri i ri i Spanjës, Julen Lopetegui, i cili zëvendësoi në korrik Vicente del Bosque-n, ka lënë jashtë skuadrës në grumbullimin e parë tre emra të njohur, Casillas-in, Fabregas-in dhe Pedro-n.
Iker Casillas, ish-portieri i Realit të Madridit, si dhe ish-kapiteni i përfaqësueses, ka luajtur në 167 takime me Spanjën, më shumë se çdo futbollist tjetër spanjoll. Fabregas është aktivizuar në 110 përballje të ekipit kombëtar spanjoll. Së bashku me Pedro-n, ata nuk janë në listën e grumbullimit për ndeshjet e shtatorit.
Ndërkohë janë rikthyer Diego Costa dhe Juan Mata, të lënë jashtë skuadrës që përfaqësoi Spanjën në Europianin e Francës.
Të thirrur në grumbullim nga trajneri Lopetegui janë: De Gea, Pepe Reina, Adrian, Ramos, Carvajal, Pique, Jordi Alba, Bartra, Azpilicueta, Javi Martinez, Sergi Roberto, Busquets, Saul, Koke, Asensio, Lucas Vazquez, Thiago Alcantara, David Silva, Juan Mata, Alcacer, Nolito, Morata, Vitolo, Diego Costa. /tesheshi.com/
