Stuhia e forcave ksenofobe dhe ekstremiste rrezikon seriozisht Italinë që më 4 mars zhvillon zgjedhjet parlamentare, të cilat do të jenë deçizive jo vetëm për vendin por edhe të ardhmen e Bashkimit Europian.
Përveç “Lëvizjes 5 Yje” të Beppe Grillos dhe Lega Nord të Salvinit, një grupim i ri dhe më i rrezikshëm po përhapet si vaji në lakra; kësaj radhe jo në veri, por në Romë e jug.
Bëhet fjalë për një grupim paramilitar që jo vetëm ngjan me Partinë Fashiste të Benitto Musolinit, por po trajtohet edhe si një zhvillim trendy.
Emrin e ka modern dhe të çuditshëm: CasaPound-shqipëruar Shtëpia Pound.
Si ikonë të lëvizjes është marrë emri i poetit të famshëm amerikan Ezra Pound, i cili jetoi në Europë gjatë viteve ‘30 të shekullit të shkuar dhe ishte një admirues i Musolinit edhe Hitlerit.
E nisur si një fondacion social, CasaPound ka arritur të depërtojë kryesisht në familjet në nevojë, pasi është përfshirë në aksione ndihmash, ku dërgojnë ushqime, veshje dhe lodra për fëmijët e tyre.
Pasi mori një ndërtesë qeveritare si seli të organizatës CasaPound strehoi në zyra 23 familje pa shtëpi, çka rriti ndjeshëm reputacionin, duke përdorur edhe rrjetet sociale në mënyrë depërtuese.
Kjo forcë ka prej vitit 2011 që është kthyer në një parti politike, duke paraqitur kandidatët e saj në të gjitha zgjedhjet e zhvilluara, dhe ka ardhur në rritje.
Tani po shikohet nga analistët si një rrezik potencial, pasi aksionet e saj nuk kanë qenë thjesht humanitare por edhe protesta apo manifestime dhune.
Vetëm pak kohë më parë, një grup militant i këtij grupimi dhunoi selinë e së përditshmes La Repubblica, një gazetë liberale dhe e qendrës së majtë.
Po ashtu kanë kërcënuar gazetarë, sindikalistë, artistë dhe politikanë.
Por kulmi arriti kur CasaPound zhvilloi një fushatë kundër Papa Françeskut, të cilin e cilësojnë si “armik të italianëve”.
Rezultantja e këtij sulmi është flamuri kryesor i kësaj partie ekstremiste që është lufta ndaj të huajve dhe sidomos emigrantëve .
Në një fushatë abonimi për gazetën e partisë, ka tronditur vendin mënyra që kjo forcë i është drejtuar qytetarëve.
Konkretisht ka ftuar popullin “nën armë” duke përdorur rimën e fjalës në italisht (no campagna di abonamenti ma di arrualamenti), dhe përdorur një pallat të periudhës fashiste, me Duçen me pushkë me bajonetë dhe me shikim të inatosur.
Interesante është se jo forcë politike ka rekrutuar në radhët e saj pjesë të botës së spektaklit, që e përdor për propagandë frenetike në rrjet.
Nina Moriç, një modele e lindur në Kroaci por me shtetësi italiane është edhe ikona propagandistike e CasaPund.
Moriç ka një trashëgimi familjare nga ustashët kroatë, të cilët kanë qenë aleatë të fashistëve italianë dhe nazistëve gjermane gjatë Luftës së Dytë Botërore.
Në faqet e organizatës dhe krerëve të saj në rrjetet sociale paraqiten foto duke shpërndarë ndihma për fëmijë dhe familje në nevojë, ku qeset e dhuratave kanë të stampuar logon e partisë.Tipike një fushatë fashiste. Por ajo që ë bën më autentike dhe që hoqi çdo dyshim ishte përkujtimi i Marshimit Mbi Romë të Benito Mussolinit, që ishte lëvizja e cila çoi Duçen në postin e Kryeministrit dhe më pas nënshtroi Italinë nën pushtetin fashist.
Zgjedhjet e 4 marsit shikohen si delikate dhe në një krah është PD-ja e Matteo Renzit që garon vetëm pa forcat e tjera të majta që janë të përçara, ndërsa në krahun tjetër janë gati në një front Lëvizja 5 Yje, si dhe koalicioni i Berlusconit me Lega Nord, që sipas gjasave nëse marrin shumicën në Dhomën e Deputetëve do të qeverisin së bashku, duke kërcënuar proceset integruese jo vetëm të Italisë por gjithë BE-së. /tesheshi.com/
