Gjykata e Arbitrazhit Sportiv të Lozanës del me një deklaratë zyrtare pasi dëgjoi të dyja palët në procesin e ndeshjes Serbi-Shqipëri ku të dyja federatat kërkojnë ndryshimin e vendimit të dhënë nga dy shkallët e gjykimit të UEFA-s. Në komunikatën e publikuar në faqen zyrtare, CAS thekson; “Gjyqtarët e Arbitrazhit Sportiv janë në proces studimi dhe gjatë ditëve të ardhshme do të hartohet vendimi përfundimtar që do të jepet përpara ndeshjes së radhës eleminatore të Euro 2016 të grupit I që zhvillohet në datën 13 Qershor, njofton SuperSport.
CAS nuk do të komentojë më në lidhje me këtë çështje”. Ky është edhe qëndrimi përmbyllës i CAS që e nis deklaratën me përshkrimin e punës së bërë në dy ditët e para të dëgjimit të palëve. “Dëgjimi i pretendimeve të Federatës Serbe të Futbollit u bë në datën 16 Prill dhe ai i palës shqiptare një ditë më pas në zyrat e CAS-it në Lozanë. Të dyja palët, këshilltarët e tyre ligjorë, ekspertë dhe dëshmitarë u dëgjuan nga një panel arbitrash”, nënvizohet në deklaratën e Gjykatës së Arbitrazhit Sportiv, e cila nuk jep një datë të saktë për publikimin e vendimit që do të marrë pasi e ka konsideruar të mbyllur procesin e dëgjimit të palëve. /tesheshi.com/
