Futbollisti që ka luajtur për shumë skuadra europiane, më së shumti në Angli, por edhe në Itali, ka lënë Boka Juniors-in në Argjentinë për të shkuar te një skuadër kineze, Shanghai Shenhua.
“Shanghai Greenland Shenhua FC arriti një marrëveshje transferimi me klubin argjentinas Boka Juniors. Carlos Alberto Tevez i bashkohet zyrtarisht Shanghai Shenhua-së,” u lajmërua këtë të enjte nga klubi kinez në faqen e tij elektronike.
Sipas mediave sportive, Shanghai Shenhua ka paguar 84 milionë euro për të nënshkruar me sulmuesin 32-vjeçar argjentinas. Ky i fundit mund të bëhet lojtari më i paguar në botë, ngase raportohet se do të fitojë rreth 753.000 dollarë në javë, ndërsa kontrata është dyvjeçare.
“Fat të mbarë Carlitos! Do të jeni gjithmonë në zemrat tona,” qe urimi i Boka Juniors-it për Tevez-in, transferimi i të cilit qe paralajmëruar prej ditësh.
Carlos Tevez u aktivizua për shtatë sezone në Premier League-n angleze, ku e fitoi kampionatin si me Manchester United-in, ashtu dhe me Manchester City-n. Dy trofe kampionati i ngriti dhe në Itali, ku luajti për Juventus-in.
Tevez ndjek shembullin e shumë futbollistëve të tjerë me emër që janë larguar drejt Superligës kineze për shkak të pagesave të mëdha. Para tij qe Oscar që la Chelsea-n për futbollin kinez. /tesheshi.com/
