Zyra e prokurorit publik të Spanjës të mërkurën (6 mars) hapi procedimet kundër trajnerit të Real Madridit, Carlo Ancelotti për mashtrim tatimor dhe kërkoi një dënim me pesë vjet burg.
Një nga trajnerët më të dekoruar në histori është akuzuar se ka mashtruar Spanjën me 1,062,079 euro taksa të papaguara, duke keqpërfaqësuar të ardhurat dhe pasuritë e tij gjatë viteve fiskale 2014 dhe 2015 në mandatin e tij të parë në Real.
“Ancelotti nënshkroi një kontratë me Realin më 4 korrik 2013, për periudhën deri më 30 qershor 2016. Aty thuhet se të ardhurat e tij përbëhen nga pagat dhe shpërblimet, si dhe e drejta për të përdorur imazhin e tij, të cilin e transferoi në klub. Për më tepër, i pandehuri punonte dhe jetonte në Spanjë, kështu që shtëpia e tij ishte një pronë në sheshin qendror të Madridit.
Megjithatë, pasi Ancelotti i dha fund marrëdhënies së tij të biznesit me Realin më herët më 25 maj 2015, ai e mori me qira apartamentin e përmendur deri në tetor të atij viti. Nisur nga kjo, është e qartë se gjatë vitit 2015, Spanja ka qenë në qendër të marrëdhënieve të tij personale dhe të biznesit”, është pjesë e aktakuzës së ngritur ndaj trajnerit të Realit.
Dhe vjen reagimi i italianit:
“Është një histori e vjetër, e vitit 2015. Prokuroria mendon se unë kam qenë banor i Spanjës në atë kohë, por nuk kam qenë. Paratë janë tashmë në prokurori dhe i takon avokatit të gjejë zgjidhje. Unë jam i sigurt që nuk kam jetuar në Spanjë në atë kohë dhe se jam i pafajshëm. Do të shohim se çfarë do të thotë gjyqtari për gjithçka”, tha Ancelotti.
Kjo nuk është hera e parë që një figurë e madhe futbollistike haset me telashe fiskale në Spanjë. Para trajnerit të madh, në bela të ngjashme janë gjendur dhe emra të tjerë të famshëm të fushës së blertë. /tesheshi.com/
