“Faleminderit Shqipërisë dhe kryeministrit të saj për pritjen e ngrohtë dhe një bisedë interesante mbi librin tim ‘Quiet Leadership’.”
Kështu ka shkruar Carlo Ancelotti në llogarinë e tij në Twitter pas vizitës së tij në Tiranë dhe një bisede me 150 të ftuar në kryeministri.
Paraqitja e librit, “Quiet Leadership: Winning hearts, minds and matches” (Udhëheqje e qetë: Të fitosh zemrat, mendjet dhe ndeshjet), ka qenë arsyeja e ardhjes së teknikut italian në kryeqytetin e Shqipërisë me ftesë të kryeministrit Rama.
Faqja zyrtare e klubit gjerman të Bajernit të Mynihut, trajner i të cilit është Carlo Ancelotti, e ka
lajmëruar gjithashtu vizitën.
Ancelotti ka folur për gjithçka në takimin në kryeministri, ku ka patur pjesëmarrës si nga fusha e sportit, ashtu dhe nga fusha të tjera, duke filluar nga përvojat e tij me klube të ndryshme e me lojtarë të tillë si Ronaldo, e deri te përshtypjet mbi përfaqësuesen e Shqipërisë.
Një bisedë e ngrohtë dhe e shpenguar, ku është treguar mënyra si Ancelotti sillet me lojtarët, si arrin te suksesi, nëpërmjet mënyrës së tij paksa të veçantë, ashtu siç e thotë shkoqur dhe titulli i librit të paraqitur para të ftuarve.
Një prej trajnerëve më në zë në futbollin europian, Ancelotti ka drejtuar skuadra të tilla si Parma, Juventusi, Milani, Çelsi, PSG-ja e Reali i Madridit. Ai sapo ka nisur një aventurë të re te Bajerni i Mynihut. /tesheshi.com/
