Nga Blendi Gashi
Albin Kurti e Visar Ymeri janë përplasur nga distanca për përçarjet në parti, ku hapur shprehin mospajtimet e thella që kanë me zhvillimet e fundit duke lënë të vetmen zgjidhje ndarjen e rrugëve.
Ndërsa Kurti u bëri thirrje të dorëhequrve të kthehen dhe të maten në zgjedhjet e brendshme, Ymeri akuzoi Albinin për mosreflektim në dy takimet që kanë zhvilluar pasi doli nga burgu, dhe mosstopin të linçimeve, duke treguar kështu se vështirë mund të arrihet një unitet mes tyre.
Se vetëvendosësit që u dorëheqën janë një hap larg VV-së, e tregon edhe një foto e dalë së fundmi në publik ku shihen bashkë disa të grupit anti-Kurti, por që java e ardhshme përfundimisht do tregojë se ç’do ngjajë me partinë e parë opozitare.
“Nuk dua të flas deri javën e ardhshme, atëherë do të kemi një qëndrim zyrtar për këtë çështje”, ka thënë Ymeri për KTV-në nëpërmjet telefonit, kur është pyetur se a do kthehen në parti pas thirrjes së Kurtit.
Se vetëvendosësit e dorëhequr nuk e shohin më veten si pjesë të Lëvizjes, edhe pse vazhdojnë të “qajnë” për ndodhitë e fundit, e tregon fakti se ata bëhen bashkë jashtë zyrave të partisë, pasi së fundmi janë mbledhur në një lokal në Prishtinë.
Aty shihen pesë deputetë të VV-së në krye me Visar Ymerin, pastaj Driton Çaushi (që deri tash nuk kishte marrë anë), pastaj Aida Dërguti, Faton Topalli dhe Shqipe Pantina.
Ndërsa në takim mugon i dorëhequri Dardan Sejdiu, pastaj Fisnik Ismaili që është në prag të largimit dhe Shpend Ahmeti, që mbetet enigma se cilit kamp i takon, si dhe Dardan Molliqaj i cili pas intervistës në “Klan Kosova” që kritikoi jo pak Albinin, ka heshtur plotësisht, përjashto shpërndarjes që i ka bërë shkrimit të Visar Ymerit në Facebook i cili kritikon Kurtin, siç thotë për mosreflektim pas dy takimeve mes tyre.
Ja deputetët anti-Kurti që mund ta formojnë një grup parlamentar
Neni 20, pika 3 e Rregullores së Kuvendit thotë se për krijimin e një grupi parlamentar nevojiten 5 për qind e deputetëve të Kuvendit ose së paku gjashtë deputetë.
Duke parë se numri i deputetëve që po japin dorëheqje nga VV dhe po dalin kundër Kurtit po shtohet në vijimësi, krijimi i një grupi parlamentar nga Visar Ymeri dhe përkrahësit e tij mund të ndodhë qysh javën tjetër.
Sipas deklarimeve të deritanishme dhe raportimeve, këta janë 11 deputetë që do t’i bashkoheshin Ymerit e Molliqajt për të formuar grupin e ri parlamentar, kurse 21 do mbajnë anën e Kurtit.
Visar Ymeri, Dardan Molliqaj, Aida Dërguti, Daradan Sejdiu, Shqipe Pantina, Fisnik Ismaili, Faton Topalli, Driton Çaushi, Ali Lajçi, Dukagjin Gorani, Frashër Krasniqi (i dënuar me burg)
Kurse deputetët që do mbesin pjesë e VV-së, pra grupit parlamentar të saj janë:
Albin Kurti, Glauk Konjufca, Donika Kadaj-Bujupi, Ismajl Kurteshi, Albulena Haxhiu, Fatmire Kollçaku, Liburn Aliu, Xhelal Sfeqla, Adem Mikullovci, Shemsi Syla, Salih Zyba, Saranda Bogujevci, Sami Kurteshi, Rexhep Selimi, Fitore Pacolli-Dalipi, Besa Baftiu, Arbërie Nagavci, Arbër Rexhaj, Drita Millaku, Salih Salihu dhe Valon Ramadani. /tesheshi.com/
