Spanjolli Carlos Velasco Carballo, që do të drejtojë ndeshjen e së shtunës në Euro 2016 midis Shqipërisë dhe Zvicrës, është një nga arbitrat më problematikë të dy prej turneve të shkuara të futbollit, në Europianin e vitit 2012 në Poloni e Ukrainë, si dhe në Botërorin e vitit 2014, të zhvilluar në Brazil.
Një problem tjetër është se kemi të bëjmë me një spanjoll, e Spanja është një nga vendet që nuk e ka njohur Kosovën. Madje ministri i Jashtëm i këtij vendi ka deklaruar se Kosova nuk do të njihet kurrë, dhe media spanjolle në përgjithësi e ka mjaft të ngarkuar retorikën ndaj shqiptarëve.
Por UEFA e caktoi sërish Carlos Velasco Carballo-n të arbitrojë ndeshjen e së shtunës pasdite në Lens mes Shqipërisë dhe Zvicrës. 45-vjeçari nga Madridi, me profesion inxhinier, ka arbitruar në vitin 2012 ndeshjen e hapjes së Europianit, ndërmjet Polonisë dhe Greqisë, duke nxjerrë jashtë loje nga një lojtar për çdo skuadër.
Ndërkaq, në çerekfinalen e Botërorit 2014 u kritikua shumë, pasi toleroi ndërhyrjet e rënda të lojtarëve të Kolumbisë ndaj atyre të Brazilit, çka sollën dëmtimin e Neymar-it.
Velasco Carballo, i cili nuk ka arbitruar asnjëherë ndonjë ndeshje të Zvicrës dhe të Shqipërisë, ka drejtuar edhe finalen e Europa League-s në 2011-tën mes Portos dhe Bragës.
Trajneri i Brazilit, Felipe Scolari, deklaroi në atë kohë se, “Carballo është thjesht një arbitër që i del situata tërësisht jashtë kontrollit.” /tesheshi.com/
