Kryeministri britanik David Cameron ka thënë sot se ai mund të pregatitet për të takuar kandidatin për President në Shtetet e Bashkuara të Amerikës, Donald Trump, por vijon të kritikojë propozimin dhe qëndrimet e republikanit ndaj myslimanëve, duke dashur t’i ndjekë ata nga Amerika e duke i cilësuar si “tepër të rrezikshëm”.
Në muajin dhjetor Cameron i cilësoi deklaratat e Trump si “përçarëse, të gabuara dhe të pamata”. Trump u përgjigj menjëherë duke thënë se me shumë mundësi, ai nuk do të vijojë të ketë marrëdhënie të mira me Cameron.
Megjithatë, shenjat nga të dyja palët gjatë kohëve të fundit flasin për ulje të gjakrave. “Kandidatët për zgjedhjet presidenciale në SHBA e kanë shndërruar në zakon takimin me liderët e Britanisë së Madhe e nëse një gjë e tillë ndodh, do të jem i lumtur ta takoj Trumpin”, – tha Cameron në një intervistë në emisionin “Peston on Sunday” në ITV.
Ai shtoi se thirrja e Trump për një përjashtim të përkohshëm të myslimanëve nga Amerika ishte “një gjë shumë e rrezikshme për t’u thënë, sa ishte edhe përçarëse dhe e gabuar”.
Javën e kaluar Trump duket se ndërroi pllakë duke thënë se ka një “marrëdhënie të mirë” me Cameron. Të premten u shpreh se Cameron e kishte ftuar në Londër, edhe pse ekipi i marrëdhënieve me publikun e Cameron nuk e pranon ekzistencën e një ftese të mundshme. /tesheshi.com/
