Kryeministri britanik do të jetë për herë të parë përballë udhëheqësve të tjerë të BE-së që prej referendumit kur të vizitojë këtë të martë Brukselin.
Ai ka për të diskutuar sot me ta mbi rezultatin e referendumit për dalje nga BE-ja dhe mbi hapat e mëtejshëm. Por nuk do të jetë i pranishëm në takimin e mëngjesit të së mërkurës, kur 27 udhëheqësit e tjerë kanë për t’u mbledhur për herë të parë pa të.
David Cameron do të pritet fillimisht nga Donald Tusk, presidenti i Këshillit Europian, e nga presidenti i Komisionit Europian, Jean-Claude Juncker, për t’u takuar më pas me pjesën tjetër të udhëheqësve të BE-së.
Vizita e Cameron-it në Bruksel vjen në një kohë që pasiguria është shtuar në vendin e tij pas referendumit që i dha të drejtë Brexit-it. Vetë ai, një mbështetës i qëndrimit në BE, ka lajmëruar dorëheqjen, edhe pse do të qëndrojë për një kohë të shkurtër në detyrë. Dorëheqje të shumta ka patur dhe te laburistët, si shenjë pakënaqësie ndaj Jeremy Corbyn-it. Ndërkaq, në aspektin financiar, paundi britanik ka preku nivelin më të ulët në më shumë se tre dekada.
Një burim i qeverisë britanike ka sugjeruar se Cameron-i shkon në Bruksel me pikëpamjen se Britania është ende një anëtare me të drejta të plota e BE-së, me gjithë rezultatin e referendumit për dalje prej saj.
E sa u përket udhëheqësve europianë, kancelarja gjermane, Angela Merkel, ka deklaruar se qeverisë së ardhshme britanike i duhet dhënë kohë për t’u përgatitur për procesin e daljes nga BE-ja. Sidoqoftë, ajo dhe presidenti francez, Hollande, e kryeministri italian, Matteo Renzi, kanë theksuar se procesi nuk mund të shtyhet pambarimisht. /tesheshi.com/
