Fjalës “selam” të shkruar në veshjen e 56-vjeçares muslimane Rose Hamid, turma pjesëmarrëse në takimin elektoral të Donald Trump-it iu përgjigj me fishkëllima dhe me thirrjet “Trump, Trump”. Më pas ajo do të nxirrej në mënyrë demonstrative nga salla ku po zhvillohej takimi në Karolinën e Jugut.
Këshilli për Marrëdhëniet Amerikano-Islame (CAIR) ka kërkuar nëpërmjet drejtorit ekzekutiv të tij, Nihad Awad, që Trump-i të kërkojë falje për gjithçka ndodhi në takimin e tij.
“Donald Trump-i duhet të kërkojë ndjesë publike për muslimanen e përzënë nga takimi i tij dhe të deklarojë qartë se muslimanët amerikanë janë të mirëpritur në procesin politik të vendit si bashkëqytetarë dhe si pjesëmarrës,” ka thënë Nihad Awad-i.
“Imazhi i një muslimaneje duke u fyer dhe duke u nxjerrë nga një tubim politik u dërgon një mesazh rrëqethës muslimanëve amerikanë dhe të gjithë atyre që i vlerësojnë traditat e vendit tonë të diversitetit fetar dhe të pjesëmarrjes civile,” ka shtuar ai.
Trump-i është një prej aspirantëve republikanë që kërkon të garojë në garën për president të SHBA-ve, por është më i spikaturi deri tani për polemikat që krijon me deklaratat e tij. E tillë ishte ajo e muajit të shkuar, kur ai propozoi që të ndalohej hyrja e muslimanëve në Shtetet e Bashkuara të Amerikës. /tesheshi.com/
