Me një gjuhë të ashpër, kreu demokrat Basha ka paralajmëruar se nuk do lejojë që mazhoranca të zgjedhë një Kryeprokuror të përkohshëm, gjë që pritet të ndodh të hënën.
“Tani Edi Rama ka humbur çdo kontroll dhe nuk do të ndalet më në rrugën e tij shkatërrimtare, fundi i tij është i vulosur. Ata që mendojnë se ne do të tolerojmë një Kryeministër të inkriminuar të sakrifikojë Shqipërinë dhe të ardhmen e fëmijëve tanë e ka gabim. Nuk ka Kryeprokuror politik. U bëj thirrje qytetarët të kuptojnë se ajo që po ndodh në Shqipëria është mënyra sesi shkatërrohet një vend”, tha Basha.
Më tej, ai ftoi dhe qytetarët që t’i bashkohen protestave të opozitës kundër Kryeprokurorit të përkohshëm, që sipas tij do jetë vegël e Ramës, gjersa po sipas demokratëve, po zgjidhet në mënyrë antikushtetuese.
“Të hënën është detyrë e çdo qytetari që beson tek demokracia, që do të ndërtojë jetën në këtë vend dhe të mos shkojë refugjat, që do të jetojë me dinjitet dhe jo me lëmoshën e narkoqeverisë, të bashkohet me protestën tonë para parlamentit.Të hënën opozita parlamentare nuk do të lejojë të kthehet në fasadën e pushtetit të krimit, ndaj ftoj cdo qytetar që të mos qëndrojë spektator por t’i bashkohet protestës tonë”, theksoi kreu i selisë blu. /tesheshi.com/
