A po shërben çadra e protestës Lulzim Bashës si një sebep për të krijuar imazhin e një partie me fytyra të reja, ku nuk shfaqen “ish-pushtetarët” Bode, Topalli, Imami, Ruli, etj.? A po shkruhet në çadër lista e re e kandidatëve për deputetë ku po “fshihen” kundërshtarët e kryetarit?!
Nëse do të tentonim sot të imagjinonim qeverinë e re pas zgjedhjeve në rast të fitores së PD-së, vështirë se mund të kishim në mendje emrat që do të uleshin krah Lulzim Bashës kryeministër. Që nga data 18 shkurt e në vijim, me anë të protestës ai po përcjell kultin e tij si kandidat për kryeministër pa dishepuj politikë, por me popullin si fasadë. Shumë pak emra kanë marrë protagonizëm në çadrën e Bashës dhe shumë protagonistë të mëparshëm janë spostuar nga komunikimi politik i opozitës.
Pas një muaji e gjysëm komunikimi të përditshëm duket se në këtë çadër ka vend për të gjithë, por jo për ish-pushtetarët e PDs-ë, ministrat e përfolur apo deputetë të vjetër të njohur si kritikë të Bashës.
Në atë çadër mund të flasin mësues, studentë, pensionistë, ish-të përndjekur politikë, aktivistë të shoqërisë civile, gazetarë dhe madje dhe ish-zëvëndëministra të Ramës, por shumë pak hapësirë ka për shumicën e grupit parlamentar të PD-së. Duket qartë se para se të vijë koha e hartimit të listës së kandidatëve për deputetë, Basha po e spastron memorien e elektoratit nga disa figura të PD-së, dhe nga ana tjetër po e përdor çadrën për t’i risjellë në skenë figura të larguara si Besnik Mustafaj, Preç Zogaj apo Besnik Aliaj duke përvijëzuar kështu partinë e “dëshirave të tij”.
Të munguarit e mëdhenj të çadrës
Po t’i hedhësh një sy faqes së Lulzim Bashës në facebook, aty ku është pasqyra fotografike e protestës së gjatë të opozitës, është gati e pamundur të gjesh një foto ku të jetë krah tij ose duke folur në çadër ish-ministri i Financave Ridvan Bode; ish-ministri i Ekonomisë dhe Energjitikës, Genc Ruli; ish-ministri i Mbrojtjes, Arben Imami; apo ish-kryetarja e Kuvendit, Jozefina Topalli. Shumë emra të tjerë të “kastës së vjetër” të PD-së, të cilët qeverisën 8 vite (2005-2013) nuk kanë më një zë në çadrën që po formëson imazhin e ri të PD-së.
Ata dhe shumë kolegë të tyre janë shfaqur në mënyrë shumë sporadike në këtë çadër dhe nuk kanë pasur asnjëherë rol protagonisti në tubimet që bëhen poshtë dritares së zyrës së kryeministrit.Madje as Grida Duma, e konsideruar si “yll në ngjitje i PD-së”, nuk është parë më rrotull në çadër pas ditës së parë ku foli për mediat për këmbënguljen e protestës së demokratëve.
Shumë prej tyre bëjnë ndonjë xhiro në çadër sa për të thënë që janë pjesë e kauzës por pa pasur asnjë barrë organizuese apo protagonizmi, si Majlinda Bregu, që njihet si deputetja e linjës së moderuar në PD, e cila shfaqet shumë rrallë nën çadër.
Nga ana tjetër Eduart Selami nuk është bërë pjesë e kësaj hipokrizie duke pritur ndonjë vend në listë dhe e ka bojkotuar çadrën.
Por nëse qëllimi i Bashës është pastrimi i partisë nga ish-pushtetarët, ose nga politikanët me të cilët elektorati është ngopur e lodhur, ai nuk po ecën me dy standarde. Nëse nxjerr jashtë loje Boden dhe Rulin nuk mund të mbash Fatmir Mediun (fytyra e të cilit njerëzve u kujton tragjedinë e Gërdecit). Nëse pretendon se po bën politikë të re, Republikë të Re dhe po sjell një frymë të re në politikë, nuk mund t’i premtosh këto në krah të Sali Berishës dhe Edi Palokës…/tesheshi.com/
