Nga çadra mbi një mujore e opozitës po investohet fuqishëm dhe në kthimin e të kaluarës komuniste si armë për goditjen e pushtetit. Kjo u vu re dhe në rastin e ministri të Rendit të sapoemëruar, Fatmir Xhafaj, i cili u vu në shënjestër si një ish-eksponent i regjimit, e ndodhur kjo pas gati 20 vitesh të tij prezent në politikë, ku asnjëherë kampi kundërshtar nuk ia kishte përmendur këtë cen në biografinë politike.
Sakaq, në çadër janë potencuar dhe disa viktimat e së djeshmes, sidomos figura klerikale katolike, siç përcillet kjo nga një mesazh i Bashës në fb, ku aludimet me realitetin janë të qarta:
Ne na munguar shpesh reflektimi i thellë mbi të kaluarën, që çon në përsëritjen e saj. Sot në Sheshin e Lirisë intelektualë, artistë, dhe figura publike përcollën përmes kujtimeve, letrave dhe krijimtarisë të disa prej figurave më të rëndësishme intelektuale të historisë sonë reflektimet mbi të shkuarën.
Angjelina Gjeka, mbesa e At Zef Pllumit, lexoi pjesë nga kujtimet monumentale të tij “Rrno vetëm për me tregue”, të cilat sjellin vuajtjet për liri, barazi dhe dinjitet në një nga periudhat e tij më të errëta të historisë sonë, periudhës së komunizmit.
Zana Turku solli në kontekstin e ditëve të sotme këngën “Të gjithë ne o djema” duke i kërkuar shqiptarëve të bashkohen kundër së keqes. Rajmonda Marku risolli thirrjet për atdhetarizëm të Gjergj Fishtës dhe vuajtjet e shqiptarëve nga krimet e diktaturës përmes vargjeve të Arshi Pipës.
Qëndresa jonë për zgjedhje të lira, për demokraci dhe dinjitet është qëndresa edhe për idealet a atyre që vuajtën për një të ardhme të mirë të Shqipërisë dhe kombit tonë”, shkruan Basha në facebook, i cili pra ka thirrur “në ndihmë” komunizmin në funksion të aktualitetit politik. /tesheshi.com/
