“Unë i besoj shumë atyre njerëzve që bënë edhe luftën edhe paqen në Kosovë”, ka thënë presidenti Nishani gjatë një interviste për gazetarin Enkel Demi.
Por vendosur në kontekst, kreu i shtetit shqiptar i është referuar në këtë rast Thaçit si ish-komandant (politik më shumë se ushtarak) UÇK-je, e më pas firmosës i marrëveshjeve me Serbinë, se sa kahjes opozitare që kundërshton këto marrëveshje, meqë mbrojti idenë që “Zajednica”, pra Serbia e tipit “vetë zot e vetë shkop” brenda Kosovës e parashikuar në Asocacionin e komunave, nuk e bosnjëzon Kosovën, siç e pretendon opozita.
Dhe ja ku vjen një nga ato që bënë luftën, por që prej 24 orësh është në burg, për më tepër grua: Time Kadriaj, ish-luftëtare e UÇK-së, e cila ka ushtruar detyrën e mjekes ushtarake, e që sot është deputete e AAK-së.
Është paradoksal fakti që, edhe pse gëzojnë dy statuse, atë të ish-luftëtarit të UÇK-së e të deputetit, por në këtë rast dhe një status të veçantë gjinor e njëherësh social e familjar siç është të qënit nënë e grua, kur vjen puna për t’i plasur në qeli për shkak të akteve siç është ai i lëshimit të gazit lotsjellës në parlament, që gjithsesi është i motivuar politikisht, ato nuk merren fare parasysh.
Rasti i Time Kadriajt nuk tregon vetëm injorim të statusit të saj të trefishtë, por dhe një zhvlerësim të luftës së djeshme, si për përbërjen e si për motivet. /tesheshi.com/
