Pas një pauze të gjatë deputetët e Kuvendit të Kosovës do t’i kthehen punëve me ç’rast në seancën e së mërkurës do të shqyrtohet për herë të parë buxheti.
Edhe pse pritet ta marrë mbështetjen në parim, ky projektligj pritet të sjellë jo pak përplasje, ndërsa opozita ka kushte për ta dhënë votën edhe në leximin e dytë.
Në buxhetin e rishikuar nga qeveria e re, tashmë dy vërejtje kryesore i ka LDK-ja, subjekt ky që tash është në opozitë, por që deri para një muaji e ka drejtuar Qeverinë dhe e kishte përgatitur edhe rishikimin e buxhetit, shkruan “Koha Ditore”.
Lumir Abdixhiku është deputet i LDK-së dhe kryetar i Komisionit parlamentar për buxhet dhe financa. Ai ka treguar se me çka nuk pajtohet në buxhetin e rishikuar.
“Ne vërejtjet kryesore i kemi pasur me heqjen e fondeve të premiumeve të sigurimeve shëndetësore, dhe si LDK kemi thënë se kjo është problematike. Ndoshta e kuptoj që nuk kanë mundur ta bëjnë fondin e sigurimeve shëndetësore me kohë, por ato para kanë qenë të dedikuara për shëndetësi. Ka pasur plot arsye që të përdoren në shëndetësi”, ka thënë Abdixhiku. /tesheshi.com/
