Buxheti i komunës së Prishtinës: u kërkohet mendim qytetarëve për shpenzimin e 65.8 milionë eurove

Në kuvendin komunal është mbajtur takimi publik për shqyrtimin e propozim-buxhetit për vitin 2016 ku janë realizuar 9 diskutime me qëllim përfshirjen edhe të  vërejtjeve dhe sugjerimeve të qytetarëve.
Gjatë këtij takimi, kreu i komunës së Prishtinës, Shpend Ahmeti ka bërë të ditur se tre projektet kryesore që kanë shpenzimet më të mëdha buxhetore, janë detyrimet e komunës ndaj ujësjellësit, ndërtimi i fabrikës së ujit në Shkabaj (5 milionë euro), projekti i koogjenerimit, faza e II, përmes të cilit parashikohet ndërrimi i nënstacioneve, si dhe projekti i nënshkruar me BERZH për blerjen e autobuzëve të rinj dhe reformimin e trafikut urban.
Kreu i komunës së Prishtinës ka veçuar si prioritet ndërtimin e shkollave dhe institucioneve parashkollore, qendrave të mjekësisë familjare, ndërtimin e stadiumit të qytetit, ndërsa po ashtu ka bërë të ditur se bashkë me qeverinë janë në prag të një marrëveshjeje për bashkimin e dy projekteve në një, atë të ndërtimit të pallatit të Operës dhe Baletit dhe sallës Koncertale në një objekt që do të shërbente për të dyja institucionet dhe do të ishte në qendër të Prishtinës, përballë Teatrit Kombëtar.
Buxheti i Komunës së Prishtinës për vitin 2016 do të jetë 65.883.762 euro. Sa i përket kategorizimit të të ardhurave, planifikohet që ato të sigurohen kryesisht nga taksa për leje të ndërtimit (8.500.000 Euro), legalizimi i ndërtimeve pa leje (5.000.000 Euro) dhe tatimi në pronën e paluajtshme (6.300.000 Euro). Ndërsa, burimet dytësore të të ardhurave do të jenë vijnë nga parkingu, shpronësimet e tokave komunale dhe taksa për shfrytëzimin e sipërfaqeve publike./tesheshi.com/