Nga Blendi Gashi
Dy partitë në pushtet, PDK dhe LDK edhe pse nuk lënë ditë pa deklaruar se koalicioni qeverisës është stabil, një gjë e tillë çdo ditë e më tepër po vërtetohet se është një jo e vërtetë.
Partitë në fjalë që njihen në opinionin publik si “armikr” të njëra-tjetrës po mundohen të paraqiten para opinionit si partnerë seriozë, por që realisht dihet se nuk janë të tillë, dhe çdo moment “martesa e zorit”, mes tyre mund të përfundojë.
Një gjë e tillë pritet të ndodh në muajin dhjetor kur projektligji për vitin 2017 pas procedimit në komisionin për buxhet dhe financa pritet të dërgohet për miratim në Kuvend.
Pra, ndarja mes PDK-së e LDK-së çuditërisht mund të troket në muajin që edhe u formua, pra në dhjetor.
Ky projektligj i cili u miratua të hënën nga qeveria e Kosovës që parashihet të jetë 2 miliarë euro aspak nuk po i pëlqen PDK-së e cila është tejet e pakënaqur me mënyrën se si është ndarë ky buxhet.
Ndonëse zyrtarë të LDK-së së Isa Mustafës, mohojnë të kenë probleme me partnerin qeverisës PDK-në sa i përket ndarjes së buxhetit, zyrtarë të lartë të kësaj të fundit haptaz kanë shprehur pakënaqësinë.
Hiç më pak se zv. ministri i Financave, Isni Kilaj, nga PDK, ka dalë kundër buxhetit të miratuar nga ana e qeverisë së Isa Mustafës, duke bërë me dije se buxheti në fjalë mund të shkaktojë probleme.
Ai në një emision televiziv ka theksuar se ky buxhet nuk do ta zhvillojë Kosovën.
“Unë jam kundër këtij buxheti. Ky buxhet nuk është në rregull dhe do t’i sjellë telashe Kosovës. Ky buxhet do të jetë vështirë i implementueshëm. Shifrat janë fiktive”, ka theksuar Kilaj.
Ky zyrtar i lartë i PDK-së ka fajësuar direkt shefin e tij, ministrin e Financave Avdullah Hoti për buxhetin në fjalë.
“Avdullah Hoti as që ka dashur të dëgjoj për këshillat tona dhe e ka propozuar këtë buxhet”, ka thënë Kilaj.
Kilaj ka thënë se nuk mund të thotë që prej ministrisë së Financave do të vijnë zgjedhjet, por një gur më tepër e rëndon më tepër gjendjen. Ai ka thënë se personalisht mendon se vendi duhet të shkojë në zgjedhje të reja në mënyrë që të matet fuqia e elektoratit.
“Ka mospajtime të mëdha për buxhetin, koalicioni mund të prishet”
Se ka mospajtime të thella ndërmjet koalicionit për çështjen e buxhetit, e kanë konfirmuar edhe burime të portalit tesheshi.com brenda PDK-së së Kadri Veselit.
Deputetë të kësaj partie, në kushte anonimiteti kanë thënë për tesheshi.com se buxheti mund të shkaktojë fare lehtë prishjen e koalicionit qeverisës.
“Po është e vërtetë se ka mospajtime të mëdha mes partisë sonë dhe LDK-së për mënyrën se si është ndarë buxheti për vitin 2017-të. Ja po e përmendi një pike ku kemi mospajtime. Ulja e buxhetit për Radio Televizionin e Kosovës (RTK) në 0.5% është gjë që nuk pajtohemi dhe assesi nuk është dashur të ndodh.
Andaj, duke parë dallimet e mëdha them me plotë përgjegjësi se koalicioni qeverisës mund të prishet shumë lehtë pasi ka acarime të mëdha për çështjen në fjalë”, ka thënë një prej ligjvënësve të PDK-së për tesheshi.com.
LDK nuk dëshiron t’i komenton deklaratat e Kilajt
Portali ynë ka kontaktuar edhe me deputet të LDK-së, ku disa prej tyre nuk kanë dashur të flasin për mospajtimet që mund t’i ketë koalicioni, kurse disa të tjerë kanë thënë se nuk dëshirojnë t’i merren me deklaratat e zv.ministrit Kilaj.
Një prej tyre është Muhamet Mustafa, i cili thotë se nuk mund të komentoj deklaratat e Kilajt të PDK-së.
“Ende nuk di esencen e këyre mospajtimeve. Kur të kem informata do të deklarohem nëse ekzistojnë problemet dhe për rrugëzgjidhjet evetuale”, ka thënë deputeti Mustafa për tesheshi.com.
Edhe njohësit e rrethanave politike në vend thonë se mospajtimet për buxhetin për vitin e ardhshëm mund të jenë një prej shkaqeve kryesore që mund të çojnë në prishjen e koalicionit
Analisti politik, Nexhmedin Spahiu, thotë se sherri është se PDK-së i konvenon shkuarja në zgjedhje të parakohshme dhe shkasi mund të merret në raste shumë të thjeshta.
“Megjithatë nuk e di nëse pikërisht buxheti do të merret si shkas, por mund të jjetë një prej arsyeve që mund të prish koalicionin qeverisës”, ka thënë Spahiu, për tesheshi.com.
Ndryshe, ditë më parë Naser Osmani, deputeti i LDK-së, njëherit kryetar i komisionit kuvendar për buxhet dhe financa, deklaroi se planifikimi për buxhetin e vitit të ardhshëm nuk ka pse të sjellë përplasje mes koalicionit qeverisës PDK-LDK.
Ai ka deklaruar se më së largu, më 20 dhjetor të këtij viti, projektligji për buxhetin e vitit 2017 do të votohet në Kuvendin e Kosovës.
