Humbja e Kosovës për t`u anëtarësuar në UNESCO, është përjetuar si zhgënjim të madh nga kreu i Diplomacisë së Tiranës, Ditmir Bushati. Por nga ana tjetër, ai tha se votimi tregoi aleancën e shqiptarëve me Perëndimin.
“Unë di që në vendin tonë është kthyer një praktikë dhe modë që kur ka fitore askush nuk penalizon fitoren dhe relativisht kur nuk ka rezultate që dëshirohen gjithmonë ka një ngut për të shigjetuar dhe gjetur përgjegjësit. Por mund të them që është rezultat zhgënjyes për shkak se për tre vota Kosova nuk arriti të bëhej anëtarë e UNESCO-s. Por ky është një votim që konsolidon aleancën strategjike të shqiptarëve me Perëndimin. Ky është një votim që mendoj se do ta vendosë në pozitë më të menduar edhe vetë BE-në për të qënë më kushtëzues ndaj Serbisë, dhe për të qënë më efiçent në partneritete reale në rajonin tonë për të evituar në çdo rrethanë kthimin e rajonit tonë në një zonë të influencave të ndryshme”, tha Bushati gjatë një interviste telefonike në edicionin e lajmeve të pasdites në Top Channel.
Sipas Bushatit, votimi u duktua dhe nga përplasjet gjeopolitike, që siç tha ai, kanë disa kohë që janë prezente dhe në Ballkan. /tesheshi.com/
