Shqipëria dhe Kosova do të zgjerojnë hartën e bashkëveprimit politik dhe diplomatik për ti shërbyer sa më mirë shtetasve tanë. Kështu u shpreh Ditmir Bushati, ministri për Evropën dhe Punët e Jashtme, gjatë takimit me zv.kryeministrin e Parë dhe ministrin e Jashtëm të Kosovës, Behgjet Pacolli.
Bushati nënvizoi se vizita e parë e homologut Pacolli pikërisht në Tiranë përbën padyshim sinjalin më të shkëlqyer të bashkëpunimit të ngushtë politik e vëllazëror mes dy qeverive.
Dy bashkëbiseduesit ndanë mendimin se Partneriteti Strategjik e gjithëpërfshirës mes dy vendeve tona, në të gjitha fushat dhe nivelet, shërben si një model dhe inkurajim për bashkëpunimin rajonal.
Mbajtja e takimit të radhës në vendin tonë mes dy qeverive, brenda këtij viti, do të jetë në funksion të një bashkëpunimi pragmatik dhe rezultativ që rrezaton vlerë të shtuar jo vetëm në ekuilibrat gjeopolitikë të rajonit, por edhe në perspektivën e përbashkët euro-atlantike.
Ministri Bushati shprehu bindjen se hapat e ndërmarra deri më tani me Kosovën në kuadër të unifikimit të tregjeve, rrëzimit të barrierave tregtare, ndërlidhjes infrastrukturore dhe energjetike janë premisë e shkëlqyer për nxitjen e interesave tona në kuadër të Procesit të Berlinit dhe veçanërisht jetësimin e objektivave të parashtruara në Samitin e Triestes për një treg të përbashkët rajonal.
Në këtë kuadër, së shpejti pritet vënia në funksion e një pike doganore të Kosovës në Portin e Durrësit, që do krijojë lehtësira të mëtejshme në qarkullimin e mallrave.
Ministri Bushati rikonfirmoi sërish mbështetjen e Shqipërisë në të gjitha proceset që po kalon Kosova, veçanërisht në avancimin e njohjeve e të anëtarësimeve në forumet ndërkombëtare, bashkëpunimin me NATO-n dhe BE-në.
Behgjet Pacolli u ndal gjithashtu tek lëvizja e lirë për të cilën shprehu bindjen se mes qeverisë “Rama 2” dhe Haradinaj do të implementohet plotësisht. /tesheshi.com/
