Ministri i Jashtëm grek Nikos Kotzias deklaroi pas takimit në Athinë me homologun e tij shqiptar, Ditmir Bushati, se Greqia është gati të abrogojë ligjin e luftës de jure por theksoi se ai realisht nuk ekziston.
Ndërkaq, shefi i diplomacisë shqiptare, Ditmir Bushati, kërkoi rishikimin e Traktatit të Miqësisë ku të përfshiheshin në të të gjitha çështjet e së kaluarës.
Ditmir Bushati dhe Nikos Kotzias janë shprehur të gatshëm të adresojnë një sërë temash dhe problemesh mes dy vendeve, për të mbyllur atë që presidenti grek Prokopis Pavllopullos më herët e quajti “mbylljen e kapitullit të së kaluarës në marrëdhëniet mes dy vendeve”.
Dy ministrat thanë se dy vendet kanë një pakt miqësie, për të cilin tashmë ka ardhur koha të rinovohet, modernizohet dhe të përshtatet me situatat aktuale.
Bushati përsëriti qëndrimin e Tiranës për adresimin e çështjeve të së kaluarës, për t’i dhënë një energji pozitive marrëdhënieve dypalëshe.
Për ligjin e luftës, Kotzias u shprej se, dy vendet nuk janë në gjendje lufte dhe kjo konfirmohet, sipas tij, nga firmosja e Traktatit të Miqësisë.
“Nëse ekzistojnë terma juridikë për të cilat pala shqiptare kërkon një interpretim tjetër, atëherë ekziston mekanizmi për zgjidhjen e kësaj”, shtoi ministri grek.
/tesheshi.com/
