Bushati, mllef për Ramën e “dashuri” për të vëllanë!

Andi Bushati, një ndër më gjuhëashprit ndaj kryeministrit Rama, jo thjesht kritik i aspekteve qeverisëse, është treguar i përmbajtshëm në rastin e një akuze të opozitës ndaj të vëllait të Ramës, Olsit, si i implikuar i mundshëm në dosjen e drogës “Xibraka”.

Avokatia e tij ka qenë e termave njerëzorë, duke sjellë si “argument” njohjen dhe shoqërinë e ngushtë mes njëri-tjetrit.

“Në këtë debat jam në konflikt interesi, sepse unë kam patur miqësi të gjatë në kohë me Olsin në rininë time. Kam tendencën ta shoh për mirë.

Këtu kemi një debat, Gaz Bardhi thotë Olsi Rama është përfshirë në trafik kokaine. Dëgjuam që Olsi Rama tha që janë shpifje, thotë mund të kem udhëtuar por nuk kam lidhje dhe këtu mbaron kjo çështje. E lexova me vëmendje, mund të jem edhe subjektiv për hir të së shkuarës.

E para, nuk ka deri më sot asnjë provë, që Olsi Rama të jetë përfshirë në trafik kokaine…”, ishte ajo çfarë tha Bushati në një prej emisioneve të shumta televizive të mbrëmjes, ku një set fytyrash e zërash llokoçiten në pellgjet e debateve të mërzitshme mbi përditshmërinë shqiptare, në aspektet më të rëndomta të saj.

Interesante në këtë rast është fakti se pse njohja e tij e dikurshme dhe me Ramën nuk ka të njëjtin efekt te gjuha e tij, duke thënë tejet e shfrenuar ndaj kryeminstrit?! Madje madje, kur e paska patur kaq shok e mik Olsin, deri sa ta avokojë përkundër frymës së tërbuar antiqeveritare, më saktë anti-Rama, pse kjo lloj shoqërie e njohje e dikurshme nuk ndikon te ai për të qenë i kursyer dhe gjuhën ndaj të vëllait në krye të qeverisjes?!

Përgjigjet mund të jenë dy: E para, karakteri. Olsi është tjetër natyrë e Edi tjetër. Pra, te Bushati, ka qenë apo është tërheqës, i dyti jo. Gjithnjë në planin shoqëror. E dyta, diferenca mes njërit e tjetrit në planin politik. Olsi është jashtë politikës, Edi jo. Dhe duke qenë figurë politike, madje qeverisës, i dyti provokon natyrshëm armiqësi, sidomos nëse e ka injoruar e nuk e ka sajdisuar një mik e të njohur, siç është Bushati në këtë rast për Edin. /tesheshi.com/