Angazhimet e Shqipërisë në planin ekonomik, të dalë nga Samiti i Triestes, ishin në qendër të takimit mes ministrit për Europën dhe Politikën e Jashtme, Ditmir Bushati, dhe komisionerit Johannes Hahn.
Bushati mori pjesë në një mëngjes pune të ministrave të Jashtëm të vendeve të Ballkanit Perëndimor.
Fokusi i këtij takimi ishte diskutimi mbi zbatimin e angazhimeve të marra në Samitin e Triestes, në mënyrë të veçantë Planin e Veprimit për krijimin e Zonës Ekonomike Rajonale, si dhe diskutimeve në takimin vijues të organizuar nga Kryeministri Rama me kryeminstrat e rajonit në muajin gusht në Durrës.
Bushati vlerësoi rolin dhe angazhimin e komisionerit Hahn për të jetësuar Zonën Ekonomike Rajonale, të cilën, theksoi ai, ne e shohim si një rrugë lehtësuese të projektit tonë evropian. Ajo nuk mund të jetë projekt alternativ e për më pak zëvendësues.
Bushati vlerësoi raportin mbi gjendjen e Unionit të Presidentit Junker dhe vuri theksin në perspektivën e qartë të zgjerimit në Ballkanin Perëndimor.
Duke folur për strukturimin e bashkëpunimit rajonal, i cili është zgjeruar ndjeshëm në vitet e fundit, Bushati theksoi rëndësinë e një shpërndarjeje të drejtë dhe të ndershme të selive të organizatave rajonale në të gjitha vendet.
Ai theksoi gjithashtu nevojën e një kalendarizimi të aktiviteteve në kuadër të bashkëpunimit të Ballkanit Perëndimor, në të gjitha nivelet. /tesheshi.com/
