Ministri i Jashtëm shqiptar, Ditmir Bushati, dërgon në Shkup si titullar të selisë diplomatike, Drejtorin në MPJ për rajonin që të përballojë situatën e jashtëzakonshme atje. Burime diplomatike i thanë tesheshi.com se situata e tensionuar në Maqedoni pas sulmit të armatosur në Kumanovën e banuar nga shqiptarët ka detyruar Tiranën zyrtare të dërgojë në Shkup të ngarkuarin me punë Bashkim Rama. Kjo, në kushtet e ngërçit politik në vendin tonë ku dekreti per emërimin e ambasadorit Fatos Reka qendron ende ne tryezen e Presidentit.
Të njëjtat burime sqaruan se për shkak të procedurave, nuk mund të dërgohej në Maqedoni i propozuari i mazhorancës për ambasador Fatos Reka, pasi presidenti Bujar Nishani ende nuk është shprehur përmes dekretimit të emërimit ose jo të tij.
Prania e Bashkim Ramës në Maqedoni jep më peshë përfaqësimit, veçse kjo ka nodhur pak vonë, ndërkohë kur deputetë të Komisionit të Jashtëm si të majtë ashtu dhe të djathtë theksojnë se MPJ duhet të kishte vepruar më energjikisht dhe të mos priste asnjë minutë. Bashkim Rama është njëherësh rektor i Universitetit Ndërkombëtar të Strugës.
Nga përleshja e dhunshme mes policisë dhe një grupi të armatosurish në komunën e Kumanovës mbetën të vrarë 22 persona, mes tyre 8 policë (njëri shqiptar) dhe 14 të armatosur, të cilësuar nga autoritetet maqedonase si grup terrorist me qëllim sulmet ndaj institucioneve shtetërore.
/tesheshi.com/
