Burri qëlloi me kallashnikov bashkëshorten e tij dhe më pas vrau veten. Kjo ishte ngjarja që ndodhi mesditën e djeshme në zonën e Kamzës në Tiranë.
Një ditë pas ngjarjes, janë zbuluar detaje mbi krimin e rëndë, që ndodhi në banesën e çiftit Halil e Dije Lita, që ndodhet në lagjen “Frutikulturë”.
Policia e Tiranës është lajmëruar në numrin e emergjencave nga vëllai i autorit të krimit, i cili ka raportuar për të shtëna me armë zjarri, shkruan Panorama.
Në momentin që shërbimet e komisariatit nr.5 kanë mbërritur në vendin e ngjarjes, kanë gjetur trupat e pajetë të bashkëshortëve, 65 e 60-vjeçarë. Trupat e pajetë të tyre, janë gjetur pranë njëri-tjetrit në kuzhinë.
Në momentin kur ka ndodhur ngjarja, në shtëpi ndodheshin vetëm dy bashkëshortët. Pavarësisht se ata janë prindër të 5 fëmijëve, prej disa vitesh jetonin vetëm. Tri vajzat e tyre janë martuar, ndërsa dy djemtë jetojnë në emigracion, njëri në Britaninë e Madhe e tjetri në Itali.
Madje, njëri prej djemve kishte ikur nga Shqipëria ditën e shtunë, pasi kishte qëndruar për disa ditë me pushime pranë prindërve. Burimet thanë se ende nuk janë sqaruar tërësisht motivet e krimit, por po hetohet për zbardhjen e rrethanave të ngjarjes./tesheshi.com/
