Në ditët kur toka u drodh sërish në Italinë fqinje, në disa goditje të fuqishme tërmeti në Italinë qendrore, tashmë e prekur nga shumë fatkeqësi natyrore, del në dritë një fakt interesant, që ndoshta do të ishte më i natyrshëm në një vend të botës së tretë dhe jo në një vend anëtar të Bashkimit Europian si Italia. Kështu, burime të medias italiane kanë zbuluar se 28 milionë eurot e dhuruara nga qytetarët italianë për të prekurit nga tërmeti në Marche, Lazio dhe Abruzzo ndodhen ende në llogarinë e hapur pranë degës qendrore të Thesarit të Shtetit. Lëvizja Pesë Yjet ka kërkuar llogari nga qeveria për këto para të mbledhura përmes mesazheve dhe çeqeve bankare, ndërsa në Dhomën e Deputetëve është zhvilluar një debat i ashpër.
Pikërisht nga ky debat, në media është hapur një kërkim i gjerë për neglizhencën e paparë ndërkohë që banorët e prekur nga tërmeti janë më në nevojë se kurrë. Media ka zbuluar se paratë ndodhen aty, por për një logjikë në dukje krejtësisht burokratike, nuk mund të preken: “protokolli i marrëveshjes për aktivizimin dhe shpërndarjen e shifrave solidare”, nënshkruar me shoqërinë e telefonisë që pret sms e solidaritetit. Kjo marrëveshje parashikon një protokoll të detajuar që duket se nuk merr parasysh as të ftohtin, as dëborën, as kërkesat emergjente në terren, nevojat e popullsisë dhe terrorin e lëkundjeve të reja të tërmetit.
Ashtu sikundër u tha edhe në debatin në parlament, së pari duhet të bëhet analizimi i dëmeve në rajone të caktuara dhe më pas rezultatet t’i nënshtrohen një komiteti garantuesisht që duhet të verifikojë kushtet e respektimit të përdorimit të fondeve.
Në fund të kësaj procedure, duhet të lëvrohen paratë. “Bëhet fjalë për një procedurë pabesueshmërisht të ngadaltë që nuk përshpejtohet pavarësisht emergjencës”, shpjegon Castelli, deputet i “Pesë Yjeve”, duke shtuar se “paradoksi është që solidariteti mbetet peng i burokracisë”.
Në të vërtetë, nisur nga veçantia malore e territorit, stinës tepër të ftohtë që mbizotëron e që nuk mund ta anashkalosh, do të duhej që makineria e solidaritetit të ishte planifikuar shumë më fleksibël për të vendosur në dispozicion të banorëve të prekur 19 milionë eurot e mbledhura, në dy transhe, përmes numrit 45500, dhe gati 8 milionë eurove të tjera nga çeqet bankare deri më 10 janar të këtij viti.
Tërmeti i parë që tronditi zemrën e vendit nga një seri e gjatë tërmetesh, ndodhi më 24 gusht. Nëse merret parasysh vetëm kjo ngjarje, shumë pas në kohë, e përpara dhurimeve të para përmes celularit që u mbyllën më 9 tetor, gjithsej numërohen 15 milionë euro prej tre muajsh.
Dhe tre muaj vlejnë sa tre vjet për ata nuk kanë një çati mbi kokë dhe që shohin sesi dëbora përpin gjithçka pa harruar. Për të shtuar historinë, forma të tjera të mbledhjes së fondeve, të premtuara nga ndërmarrjet private, tashmë kanë dhënë rezultate konkrete dhe të dukshme. Më 29 janar, do të mbyllet dhurimi i pjesë së tretë të parave përmes sms-ve, nisur më 31 dhjetor, e që ka arritur të çojë në destinacion rreth 1 milion euro. Qytetarët kanë paguar 2 euro për mesazh, para që shërbejnë për të rindërtuar shtëpi, shkolla, për të shpëtuar ndërtesa kulturore. E rëndësishme është që të arrijnë sa më shpejt tek ata që kanë aq nevojë dhe për të cilët ishin destinuar.
Përgatiti: Juli Prifti – /tesheshi.com/
